Noreg styrker den globale beredskapen mot framtidige pandemier

Verda er i dag betre førebudd på nye helsekriser enn før covid-19-pandemien. Samtidig viser erfaringane frå dei siste åra kor viktig det er å halde oppe investeringane i forsking, beredskap og internasjonalt samarbeid for å møte framtidige sjukdomsutbrot.

– Pandemiar kjenner ingen grenser. Difor treng vi  internasjonalt samarbeid som kan bidra til rask utvikling av vaksinar og andre mottiltak når nye helsetruslar oppstår. CEPI er eit godt døme på korleis land kan samarbeide for å styrkje den globale beredskapen, seier utviklingsminister Åsmund Aukrust.

Noreg har sidan starten  vore ein sentral støttespelar for CEPI (Coalition for Epidemic Preparedness Innovations). Organisasjonen vart etablert i 2017 som eit internasjonalt samarbeid  mellom styresmakter, forskingsmiljø, sivilsamfunn og filantropiske aktørar for å utvikle vaksinar og andre biologiske mottiltak mot epidemiar og pandemiar. CEPI arbeider for at slike verkemiddel skal vere tilgjengelege for alle som treng dei.

Den norske støtta blir kunngjord i samband med FNs høgnivåveke under FNs 81. generalforsamling.

Ei satsing på framtidig beredskap

Den nye strategien til CEPI, CEPI 3.0, gjeld for perioden 2027–2031. Strategien skal styrkje verdas evne til å førebyggje og handtere framtidige epidemiar og pandemiar.

Eit sentralt mål i arbeidet er den såkalla «100-dagarsmålet». Målet er å kunne utvikle, teste og ha klare trygge og effektive vaksinar mot ein ny pandemisk trussel innan 100 dagar etter at viruset er oppdaga. Dette målet er blitt løfta fram av både G7- og G20-landa som ein viktig del av den globale helseberedskapen.

For å klare dette skal CEPI blant anna arbeide med å utvikle vaksinar mot prioriterte sjukdomstruslar, styrkje  teknologiar som raskt kan tilpassast nye virus, og sikre betre samarbeid  for forskarar, helsestyresmakter  og vaksineprodusentar over heile verda.

– Erfaringane frå covid-19 viste kor avgjerande internasjonalt samarbeid, forsking og innovasjon er når verda møter nye helsekriser. Gjennom støtta til CEPI bidreg Noreg til at verda står betre rusta neste gong ein alvorleg helsetrussel oppstår, seier Aukrust.

Frå forsking til handling

CEPI støttar forsking på smittsame sjukdommar som kan utvikle seg til epidemiar eller pandemiar. Organisasjonen samarbeider med styresmakter, forskingsinstitusjonar, industri og internasjonale organisasjonar over heile verda for å styrkje beredskap og rask respons når nye truslar oppstår.

Den nye strategiperioden byggjer vidare på erfaringane frå dei første åra av CEPIs arbeid og skal bidra til å sikre at ny kunnskap og teknologi raskare kan takast i bruk når verda står overfor nye helseutfordringar.

Noreg har over lang tid vore ein pådrivar for internasjonalt samarbeid om global helse. Støtta til CEPI er ein del av regjeringa sitt arbeid for å styrkje global helseberedskap og bidra til ein tryggare og betre førebudd verd.