Sjukepengar

Kven får sjukepengar?

• Oppteningstid: Du må ha vore yrkesaktiv i minst fire veker før du vart sjuk.
• Inntektskrav: Inntekta di må vere minst halvparten av folketrygda sitt grunnbeløp.
• Likestilt aktivitet: Periodar med dagpengar, sjukepengar, foreldrepengar eller stønad ved sjukt barn tel også.
• Gradert sjukemelding: Dersom du kan jobbe delvis, kan sjukepengane graderast ned til 20 %.

For å ha rett til sjukepengar må du så tidleg som mogleg, og seinast innan åtte veker, prøve deg i arbeidsretta aktivitet. Unntak gjeld dersom medisinske grunnar hindrar dette, eller dersom arbeidsrelaterte aktivitetar ikkje kan gjennomførast på arbeidsplassen.

Korleis blir sjukepengane rekna ut?

• Arbeidstakarar og frilansarar: Reknast ut frå inntekt rapportert til a-ordninga dei siste tre månadene før du vart sjuk (A-ordninga er eit system der arbeidsgivarar rapporterer inntektsopplysningar til myndigheitene).
• Sjølvstendig næringsdrivande: Reknast ut frå gjennomsnittet av pensjonsgivande årsinntekt dei siste tre åra.

Arbeidstakarar får sjukepengar frå arbeidsgivar dei første 16 dagane. Både arbeidstakarar, frilansarar og sjølvstendig næringsdrivande får sjukepengar frå trygda frå 17. fråværsdag. Sjukepengar til arbeidstakarar og frilansarar blir gitt med 100 prosent av sjukepengegrunnlaget. Sjølvstendig næringsdrivande har krav på sjukepengar med 80 prosent av sjukepengegrunnlaget. Sjukepengegrunnlaget kan ikkje for nokon av gruppene vere høgare enn seks gonger grunnbeløpet. Sjølvstendig næringsdrivande og frilansarar kan mot særskilt premie teikne forsikring som kan gi opptil 100 prosent dekning av inntektstapet opptil seks gonger grunnbeløpet.

• Du finn meir informasjon om sjukepengar på Nav sine heimesider
• Sjå relevant regelverk: Folketrygdloven kapittel 8 (Sykepenger)