100 millionar kroner til kyst, hamn og farleier

- Denne satsinga er heilt sentral for å følgje opp prioriteringane i Nasjonal transportplan om å ruste opp hamner og farleier, og sikre vidare utvikling av fiskeriavhengige kystsamfunn, seier fiskeri- og havminister Marianne Sivertsen Næss.

Regjeringa vil i 2025 styrke løyvinga til Kystverket med 100 millionar kroner. Midlane skal mellom anna brukast til vedlikehald og fornying av navigasjonsinnretningar, og til planlegging og gjennomføring av mindre tiltak i farvatnet.

Dette er positivt for klima og miljø, og noko som kjem fleire kystsamfunn til gode, seier Næss.

Midlane skal og brukast til å styrke Kystverket sitt arbeid med digitalisering, mellom anna BarentsWatch, som gjer offentlege data om maritim aktivitet tilgjengeleg.

Fiskerihamner

- I Statsbudsjettet for 2024 ga regjeringa eit stort løft til fiskerihamnene. I dette forslaget til statsbudsjett følgjer vi opp med å sikre tilstrekkelege rammer, slik at prosjekt som er planlagde kan gjennomførast, seier fiskeri- og havminister Marianne Sivertsen Næss.

Regjeringa går også inn for bygging av ytre molo i Vardø hamn i Finnmark. Det skal etter planen gjennomførast ein tilbodskonkurranse i 2025.