15 millionar kroner meir til å utvikle verdas mest berekraftige mineralnæring

– Verdas etterspørsel etter mineral og metall som trengs til den grøne og digitale omstillinga vil fortsette å auke kraftig. Derfor treng vi ny lønnsam og berekraftig utvinning og produksjon av mineralske råvarer. Her kan Noreg spele ei større rolle enn i dag. For å utnytte potensialet er det behov for meir kartlegging, raskare realisering av mineralprosjekt og meir forsking, seier næringsminister Jan Christian Vestre.

I revidert nasjonalbudsjett for 2023 blei det løyvd 20 millionar kroner ekstra til oppfølging av mineralstrategien. No foreslår regjeringa ytterlegare styrking av dette arbeidet i forslaget til statsbudsjett for 2024.

Fem millionar til auka kartlegging

Noreg har eit stort potensial for mineral og metall som er naudsynt for fornybar energi og batteri. For å utnytte Noreg sitt potensial, er det naudsynt å auke leite- og kartleggingsverksemda. Gode geologiske data er ein føresetnad for at private leite- og kartleggingsverksemder kan målrette undersøkingane sine. Regjeringa foreslår difor fem millionar kroner til Noregs geologiske undersøking (NGU) sitt arbeid med å kartlegge Noregs mineralressursar, og at dette rettast særleg mot kritiske mineral.

Raskare realisering av mineralprosjekt (One stop shop og fasttrack)

Regjeringa er oppteken av god framdrift for prosjekt for kritiske råvarer. Direktoratet for mineralforvalting med Bergmeisteren for Svalbard (DMF) skal prioritere kritiske mineral i si sakshandsaming og etablere ei ordning med nasjonal koordinering av kritiske mineralprosjekt. Vidare skal det lagast eit «mineralkompass» som skal gje betre informasjon til mineralverksemder om interessekonfliktar, som til dømes informasjon om natur, andre næringar eller kulturminne. Regjeringa foreslår difor fem millionar kroner til Direktoratet for mineralforvalting med Bergmeisteren for Svalbard.

Fem millionar til Norges forskningsråd

Løysingar på utfordringar knytt til berekraft er avgjerande for å sikre langsiktige vekstmoglegheiter for mineralnæringa i Noreg. Det er behov for forsking på ei rekkje område framover. Regjeringa foreslår difor fem millionar kroner til Noregs forskingsråd for å leggje til rette for ei berekraftig mineralforvaltning.