25 millionar kroner til ABC-kampanjen for psykisk helse

ABC-kampanjen har vore prøvd ut i Trøndelag med positive resultat.

– No vil vi at heile landet skal få glede av modellen. Vi veit at grunnlaget for god psykisk helse og livskvalitet blir lagt gjennom heile livet. Arenaer som fremmer aktivitet, meining og tilhøyrsle fremmer også god psykisk helse og livskvalitet, seier helse- og omsorgsminister Jan Christian Vestre.

ABC for psykisk helse er å gjere noko aktivt, gjere noko saman med andre og gjere noko meiningsfylt. Kampanjen er organisert gjennom partnarskap med samfunnsinstitusjonar- og organisasjonar. Det gjer det lettare for den enkelte å gjere noko aktivt og meiningsfylt saman med andre. Kampanjen skal rette seg inn mot dei arenaene kor folk er, til dømes barnehagar, skular, arbeidsplassar og høgskular og universitet.

Regjeringa foreslår å løyve 20 millionar kroner til ei ny, fylkeskommunal tilskotsordning for ABC-kampanjen, og 5 millionar kroner til nasjonale informasjonstiltak og følgeevaluering av kampanjen. Den nasjonale ABC-kampanjen er ei oppfølging av opptrappingsplanen for psykisk helse og målet om å auke kunnskap om psykisk helse i heile befolkninga. Helsedirektoratet skal støtte opp om fylkeskommunane sitt arbeid med kampanjen.