2,83 milliardar kroner meir i frie inntekter til Akershus neste år

Veksten er fordelt med om lag 5,1 milliardar kroner til kommunane og 1,3 milliardar kroner til fylkeskommunane.

Den foreslåtte veksten er høgare enn varsla i kommuneproposisjonen. Det kjem av at anslaget for meirkostnader til pensjon no er høgare. Regjeringa varsla i kommuneproposisjonen at veksten kunne ende opp utanfor det varsla intervallet dersom meirkostnader til demografi og pensjon vart annleis. Regjeringa har dermed heldt sin lovnad.

– For å lykkast med dei krevjande og viktige oppgåvene kommunane skal løysa for å gi folk ein betre kvardag, gir vi kommunane ein god og føreseieleg økonomi. Veksten sikrar at sektoren får dekt auka kostnader til demografi og pensjon, i tillegg til å gi noko auka handlingsrom til utbygging av tenestetilbodet, seier kommunal- og distriktsminister Sigbjørn Gjelsvik.

Fordeling av frie inntekter

Tabellen nedanfor viser fordelinga av dei frie inntektene for kommunane i Akershus fylke og den nominelle veksten frå 2023 til 2024.. Veksten er rekna frå eit oppdatert anslag på dei frie inntektene i 2023. Det inneber at oppjusteringa av skatteanslaget knytt til inntekt og formue på 4,1 mrd. kroner er medrekna.

For å gjere inntektsnivået i 2023 samanliknbart med inntektsnivået i 2024, er det korrigert for oppgåveendringar, regelendringar og endringar i finansieringa av oppgåvene til kommunesektoren.

Variasjonen i veksten mellom kommunar og mellom fylkeskommunar kan i all hovudsak forklarast med utvikling og endring i befolkninga og endringar i skjønnstilskotet og dei regionalpolitiske tilskota. For små kommunar kan mindre endringar gje store utslag i anslaget på vekst målt i prosent.

Etter at Grønt hefte vart trykt er det oppdaga ein feil i fordelinga av det førehandsfordelte skjønstilskotet til kommunane i Østfold, Akershus og Buskerud. Dette påverkar størrelsen på samla rammetilskot til desse kommunane i 2024 og anslaget på vekst i frie inntekter frå 2023 til 2024. Tabellen under, som inneheld den korrekte fordelinga av skjønstilskotet til desse kommunane i 2024, har derfor ikkje same vekstanslag som tabell 3-k i Grønt hefte.

Tabell – Anslag på frie inntekter i 2024 og nominell vekst frå 2023 til 2024

	Anslag på frie inntekter 2024 (1000 kr)	Vekst frå anslag på rekneskap 2023 - 2024
Kommune		Nominelle kroner (1000 kr)	Prosent
	1	2	3
3201 Bærum	10 665 372	472 816	4,6
3203 Asker	7 383 419	330 278	4,7
3205 Lillestrøm	6 202 388	278 383	4,7
3207 Nordre Follo	4 488 686	208 322	4,9
3209 Ullensaker	2 879 980	118 882	4,3
3212 Nesodden	1 412 199	70 734	5,3
3214 Frogn	1 143 704	53 853	4,9
3216 Vestby	1 305 217	66 584	5,4
3218 Ås	1 404 581	67 811	5,1
3220 Enebakk	762 841	30 716	4,2
3222 Lørenskog	3 152 137	158 869	5,3
3224 Rælingen	1 335 641	65 139	5,1
3226 Aurskog-Høland	1 264 379	65 564	5,5
3228 Nes	1 615 151	71 223	4,6
3230 Gjerdrum	494 497	23 606	5,0
3232 Nittedal	1 771 172	97 559	5,8
3234 Lunner	643 937	30 903	5,0
3236 Jevnaker	482 694	29 184	6,4
3238 Nannestad	1 051 615	52 734	5,3
3240 Eidsvoll	1 878 151	92 945	5,2
3242 Hurdal	222 139	8 706	4,1
Til fordeling gjennom året	11 334
Akershus	51 571 233	2 395 878	4,9
Akershus fylkeskommune*	9 081 017	442 720	5,1
*Viken fylke blir delt 1.1.2024. For vekst i frie inntekter 2023-2024 er det m.a. gjort eit anslag over Akershus sin del av Viken fylkeskommune sine frie inntekter i 2023.

 

Første kolonne:
Viser overslag på kor mykje kvar kommune og fylkeskommune får i frie inntekter i 2024, målt i 1 000 kroner.

Andre kolonne:
Viser overslag på vekst frå anslag på rekneskap for 2023 til anslag for 2024 i statsbudsjettet, målt i nominelle kroner. Veksten er korrigert for endringar i oppgåvene til kommunane og fylkeskommunane.

Tredje kolonne:
Viser den nominelle oppgåvekorrigerte veksten målt i prosent.