31,9 millionar kroner i bu- og reisestøtte til studentar

– No får fleire tusen studentar støtte til ein praksisplass, og kommunane kan tiltrekke seg studentar. Det er vinn-vinn for alle, og  eit målretta grep for å for å styrke tilgangen på helsepersonell i distriktskommunane. Vi veit at studentar som har vore i praksis i ein kommune, ofte tar jobb der etterpå også, seier forskings- og høgare utdanningsminister Oddmund Hoel (Sp).

Norske kommunar slit med å få tak i nok helsepersonell. Regjeringa har allereie oppretta fleire studieplassar, men for kvar studieplass må det følge ein praksisplass.

Støtte til studentar tre år på rad

For tredje år på rad prioriterer regjeringa å støtte helse- og sosialfagstudentane med stipend for å dekke utgiftene deira når dei skal ut i obligatoriske praksisperiodar. Når studentane får dekka slike utgifter, betyr det at utdanningsinstitusjonane lettare kan legge opp til praksisplassar lengre vekk frå campus. 

Meir enn 2500 studentar vil no få støtte i årets tildeling. Det er dei studentane som har fått praksis lengst unna campus som blir  prioriterte. 

Samla har regjeringa til no fordelt litt over 130 millionar kroner i bo- og reisestøtte til helse- og sosialfagstudentane i perioden 2022–24.

Det er Direktoratet for høgare utdanning og kompetanse (HK-dir) som administrerer ordninga.

Slik er midlane fordelte:

Institusjon	Tildelt beløp
UiT Noregs arktiske universitet	kr 9 268 085
Høgskulen på Vestlandet	kr 7 100 943
NTNU	kr 7 058 819
Høgskulen i Molde	kr 3 126 653
Nord universitet	kr 2 669 536
Universitetet i Agder	kr 432 546
Lovisenberg Diakonale Høgskule	kr 391 716
Universitetet i Bergen	kr 363 631
VID vitskaplege høgskule	kr 308 438
Universitetet i Stavanger	kr 285 030
OsloMet	kr 258 036
Universitetet i Søraust-Noreg	kr 247 694
Universitetet i Oslo	kr 241 254
Høgskulen i Volda	kr 147 299