492 millionar kroner til samfunnsnyttige og humanitære organisasjonar
Pressemelding | Nr: 76/24 | Dato: 12.12.2024 | Kultur- og likestillingsdepartementet
Organisasjonar som Kreftforeininga, Luftambulansen, Mental Helse og Norske Sanitetskvinner får no utbetalt 492 millionar kroner frå Norsk Tippings overskot. Dette er ein auke på 42 millionar kroner frå i fjor.
– Vi vil at alle uansett bakgrunn skal få vere med i fellesskapa våre. Det er viktig i seg sjølv, men det er også førebyggjande. Desse organisasjonane gjer ein utruleg viktig innsats for å skapa gode møtestader for alle. Då må dei få bruke tida si på det dei er best til – nemleg å hjelpe andre. Difor er midlane frie slik at dei sjølve kan velje kva dei vil gjere med dei, seier kultur- og likestillingsminister Lubna Jaffery.
Kirkens Bymisjon er den største mottakaren i år, og får 88 millionar kroner.
56,6 millionar kroner av potten er utbetalingar som følgje av vedtak i klagesaker.