6,4 milliardar kroner vekst i frie inntekter til kommunesektoren i 2024

I kommuneproposisjonen for 2024 varsla regjeringa ein vekst i frie inntekter innanfor eit intervall på 5,6 – 5,9 milliardar kroner. Som følgje av nye og høgare anslag for meirkostnader til pensjon i 2024, foreslår regjeringa no ein vekst på 6,4 milliardar kroner.

– Veksten sikrar at sektoren får dekt auka kostnader til demografi og pensjon i 2024, i tillegg til å gi noko auka handlingsrom, seier kommunal- og distriktsminister Sigbjørn Gjelsvik.

Veksten er fordelt med 5,1 milliardar kroner til kommunane og 1,3 milliardar kroner til fylkeskommunane. Innanfor veksten til kommunane er 150 millionar kroner grunngitt med satsing på psykisk helse og rus, medan 100 millionar kroner er fordelte til dei kommunane som tapar mest på modellen for gradert basiskriterium. I tillegg kjem 40 millionar kroner til helsestasjon og skulehelsetenesta. 300 millionar kroner av veksten til fylkeskommunane er grunngitt med omlegging av inntektssystemet.

– Då førre regjering ville slå saman kommunar endra dei òg reglane for basistilskotet. Mange kommunar har blitt straffa for at dei ikkje slo seg saman, ved at dei ikkje får full kompensasjon for smådriftsulemper i inntektssystemet. Senterpartiet og Arbeiderpartiet i regjering har vore tydeleg på at vi er mot å straffe kommunar på ein slik måte, og no startar vi jobben med å rydde opp etter Solberg-regjeringa på dette området, seier Gjelsvik.

Ny berekningar syner at skatteinngangen for kommunesektoren i 2023 ligg an til å bli 4,1 milliardar kroner høgare enn anslått i vår. Samstundes er kostnadsveksten for kommunesektoren i 2023 no anslått å bli 3,2 milliardar kroner lågare enn lagt til grunn ved handsaminga av revidert nasjonalbudsjett og kommuneproposisjonen i vår.

– Saman med den auka veksten i frie inntekter, gjer dei nye anslaga for kostnadsveksten, at handlingsrommet for kommunane ligg an til å bli betre ved inngangen til 2024 enn det vi så føre oss då kommuneproposisjonen blei handsama i vår, seier Gjelsvik.

Fylkesvis oversikt:

• 1,27 milliardar kroner meir i frie inntekter til Agder neste år
• 1,19 milliardar kroner meir i frie inntekter til Østfold neste år
• 2,83 milliardar kroner meir i frie inntekter til Akershus neste år
• 1,02 milliardar kroner meir i frie inntekter til Buskerud neste år
• 422 millionar kroner meir i frie inntekter til Finnmark neste år
• 1,61 milliardar kroner meir i frie inntekter til Innlandet neste år
• 1,1 milliardar kroner meir i frie inntekter til Møre og Romsdal neste år
• 2,54 milliardar kroner meir i frie inntekter til Vestland neste år
• 975 millionar kroner meir i frie inntekter til Vestfold neste år
• 1,95 milliardar kroner meir i frie inntekter til Trøndelag neste år
• 836 millionar kroner meir i frie inntekter til Troms neste år
• 726 millionar kroner meir i frie inntekter til Telemark neste år
• 1,86 milliardar kroner meir i frie inntekter til Rogaland neste år
• 1,07 milliardar kroner meir i frie inntekter til Nordland neste år
• 2,82 milliardar kroner meir i frie inntekter til Oslo neste år

Kommunal- og distriktsdepartementet sin pressetelefon: 22 24 25 00
E-post til kommunikasjonseininga: ke@kdd.dep.no