75 millionar til lokalt og regionalt kulturliv

– Vi håper og trur at dette kan bidra til fleire og betre kulturtilbod i alle regionane i landet. Fylka er svært ulike både når det gjeld geografi, demografi og kulturtilbod. For at desse pengane skal treffe lokale og regionale behov ønsker vi å gi fylkeskommunane stort handlingsrom i utlysing og fordeling, seier kultur- og likestillingsminister Lubna Jaffery.

Dette blir ei ny desentralisert tilskotsordning på kulturområdet der målgruppa er både frivillige og profesjonelle kulturaktørar.

Dei 75 millionane til regionale kulturfond kjem i tillegg til rammetilskotet og dei frie inntektene til fylkeskommunane.

– Regjeringa vil at kunstnarar skal kunne busette seg over heile landet, og at folk skal ha tilgang på kunst og kultur der dei bur. Eg håper dette kan støtte opp under endå fleire initiativ og samarbeid mellom lokale eldsjeler, ambisiøse amatørar og profesjonelle dirigentar, skodespelarar og kunstnarar, og bidra til gode kulturopplevingar for små og store, seier Jaffery.

Målet er at midlane i ordninga regionale kulturfond skal lysast ut i fylka allereie i 2025.

Regjeringa foreslår at pengane skal fordelast slik:

Fylkeskommune	Beløp (1 000 kroner)
Østfold	4 327
Akershus	7 727
Oslo	7 574
Buskerud	4 108
Innlandet	5 404
Vestfold	3 854
Telemark	3 363
Agder	4 534
Rogaland	5 908
Vestland	7 423
Møre og Romsdal	4 110
Trøndelag	6 154
Nordland	4 163
Troms	3 428
Finnmark	2 923
Totalt	75 000