Arbeidsgruppe foreslår at Stortinget skal fastsetje løna til dommarane

Arbeidsgruppa blei sett ned av Kommunal- og distriktsdepartementet i desember 2023 og har vore partsamansett. Ho fekk i mandat å greie ut og kome med forslag til ny lønsmodell for dommarar i tingrettane, lagmannsrettane og jordskifteretten. I tillegg har arbeidsgruppa òg vurdert på kva måte dommarane kan vere tilknytte statens særavtalar, som hovudavtalen.

Lønsfastsetjing for dommarar skjer i dag på ulike måtar. Dommarane i tingrettane og lagmannsrettane får løna fastsett administrativt av Digitaliserings- og forvaltningsdepartementet. Dommarane i jordskifteretten er omfatta av hovudtariffavtalane i staten, og får løna si fastsett i samsvar med desse avtalane. Stortinget fastset løna til dommarane i Høgsterett.

Arbeidsgruppa tilrår at løn for dommarane i framtida bør fastsetjast av Stortinget, etter innstilling frå eit uavhengig utval, og at dette vert forankra i lov. Arbeidsgruppa har særleg lagt vekt på omsynet til domstolane og dommarane si uavhengigheit. Les utgreiinga her.

Utvalet sine vurderingar og tilrådingar er samrøystes.

Digitaliseringsdepartementet vil no samarbeide med Justis- og beredskapsdepartementet for å gå gjennom rapporten og vurdere korleis den best kan følgjast opp.