Auka makstak i tilskotsordninga for sysselsetting av sjøfolk

– Maritim næring er spreidd langs heile kysten, og storparten av norske sjøfolk er busett i kystfylka. Denne satsinga vil bidra til å halde oppe rekrutteringa av norske sjøfolk, og norsk maritim kompetanse, seier fiskeri- og havminister Marianne Sivertsen Næss.

Gjennom tilskotsordninga for sysselsetting av sjøfolk kan reiarlag få tilskot tilsvarande innbetalt forskotstrekk av inntektsskatt, trygdeavgift og arbeidsgivaravgift for arbeidstakarar som kvalifiserer for tilskot. Maksimalt utbetalt tilskot per arbeidstakar er 220 000 kroner i 2024.

Regjeringa vil i 2025 auke makstaka i alle tilskotsmodellane, utanom den generelle tilskotsmodellen for skip i NIS, til 225 500 kroner. Støttenivået i den generelle tilskotsmodellen for skip i NIS blir foreslått ført vidare på 26 prosent av tilskotsgrunnlaget.

Det er høg aktivitet i maritim næring, og om lag 14 000 sjøfolk er omfatta av ordninga. Regjeringa har likevel prioritert å auke taka til 225 500 kroner, seier fiskeri- og havminister Marianne Sivertsen Næss.

Tilskotsordninga er regelstyrt og rettsbasert, og overslagsløyvinga til ordninga er foreslått til 2 459 millionar kroner i 2025.