Auka tilskot til Anno museum og Norsk Bergverksmuseum

– Eg er glad for at vi har funne rom til å støtte to viktige formål. Dette vil sikre at vår felles kulturarv om norsk utvandrarhistorie og myntverkshistorie blir forvalta på ein god måte og formidla til eit breitt publikum, seier kultur- og likestillingsminister Lubna Jaffery.

I 2025 er det 200 år sidan den fyrste organiserte utvandringa frå Noreg til Amerika fann stad. Anno museum har eit koordineringsansvar for utvandringsjubileet. Jubileet skal markerast med arrangement i Noreg og i Nord-Amerika.

Jubileet skal både setje søkjelys på utvandringa i eit historisk perspektiv, og knytte det opp til dei store migrasjonsutfordringane i vår eiga tid. Regjeringa har allereie tilgodesett Anno museum med støtte til jubileumsarbeidet i Noreg med tre millionar kroner, og foreslår no i tillegg fem millionar til museet til gjennomføring av jubileumsmarkeringa i New York.

Regjeringa foreslår også ein million kroner til Norsk Bergverksmuseum for å leggje til rette for at museet kan forvalte og formidle Noregs myntverkshistorie på ein god måte.