Avtale om ekstra innsats i bydelen Torstrand i Larvik

− For å skape gode levekår og inkluderande lokalsamfunn i byar og byområde, må stat og kommune jobbe saman. Eg er glad for at vi utvidar samarbeidet om områdesatsingar til fleire byar, og har tru på at dette vil løfte lokalsamfunna og få fleire til å delta, seier kommunal- og distriktsminister Erling Sande.

Det var statssekretær Sigrun Wiggen Prestbakmo i Kommunal- og distriktsdepartementet som underteikna avtalen med Larvik på vegne av regjeringa.  

Larvik vil prioritere tiltak innanfor bustad-, bumiljø og oppvekstvilkår, arbeid, skule og fritid, møteplassar og førebygging av kriminalitet.

– Å få områdemiddel for Torstrand er kjærkomne middel, som vil kome godt med i utviklinga av denne spanande bydelen.  Pengane skal brukast i tett samarbeid med nærmiljøet, og gjer det mellom anna mogleg å tilsette ein prosjektleiar, seier ordførar Birgitte Gulla Løken.

− Gode og inkluderande nærmiljø skaper tryggleik og nettverk som aukar sjansen for deltaking i samfunnslivet. Eg er derfor glad for at vi kan bidra med pengar og nettverk som gir Larvik kommune eit større handlingsrom til å ta hand om utfordringane dei har, seier kommunal- og distriktsminister Sande.

Fakta om områdesatsing

• Områdesatsingar er langsiktige avtalar mellom stat og kommune.
• Målet er å gi ein ekstra innsats i område med mange innbyggjarar og utfordringar knytt til levekår.
• Områdesatsingane skal betre fysiske og sosiale nærmiljøkvalitetar og tenesteutvikling.
• Satsinga skal bidra til å utvikle nye erfaringar og innovative løysingar, som kan brukast av fleire kommunar som også har levekårsutfordringar.