Beredskapslagring av seks månaders normalforbruk av smittevernutstyr
Nyheit | Dato: 30.06.2023 | Helse- og omsorgsdepartementet
Helse- og omsorgsdepartementet sender på høyring forslag om at kommunar, fylkeskommunar og regionale helseføretak skal sørgje for beredskapslagring av smittevernutstyr for helse- og omsorgstenesta tilsvarande seks månaders normalforbruk.
Plikta er avgrensa til hanskar, munnbind, åndedrettsvern, smittefrakkar eller heildekkjande drakt, og dessutan briller eller visir. Lagringsplikta skal ikkje gjelde smittevernutstyr som verksemda i ein normalsituasjon ikkje har eit forbruk av. Smittevernutstyret skal lagrast i Noreg.
Forslaget skal sikre ein buffer for forsyningar til den kommunale helse- og omsorgstenesta, spesialisthelsetenesta og tannhelsetenesta i situasjonar som kan forårsake avbrot i ordinære forsyningslinjer til landet. Lokal lagring styrkjer beredskapen og gir auka handlingsrom til å finne formålstenlege løysingar ved pandemi og andre helsekrisar. Sikker tilgang på smittevernutstyr gir auka tryggleik for både tilsette i helse- og omsorgstenesta, pasientar og pårørande.