Bidreg med 151 millionar kroner til afghanarar i nød

– Det er viktig at vi alle held vårt engasjement fram for det afghanske folket. I Afghanistan er kvinner og jenter særleg utsette og treng for vår støtte. Derfor treng vi òg kontakt med Taliban, der vi seier tydeleg frå om vårt syn på den uakseptable behandlinga deira av mellom anna kvinner og jenter, seier utanriksminister Espen Barth Eide.

Noreg bidreg med støtte til menneskerettsarbeid og sivilsamfunn i Afghanistan, og meir langsiktig støtte til mellom anna helse, utdanning og jobbskaping. Ingen norske pengar går direkte til Taliban, som no styrer landet.

– Afghanarar lid framleis på grunn av den langvarige humanitære krisen i landet. FN reknar med at nesten 23 millionar menneske i Afghanistan har behov for humanitær hjelp i år. Nyleg mista fleire hundre menneske livet og fleire tusen mista livsgrunnlaget sitt på grunn av kraftig flaum i det nordaustlege og vestlege Afghanistan, seier utviklingsminister Anne Beathe Tvinnereim.

Fleire millionar menneske er på flukt i Afghanistan eller har søkt tilflukt i nabolanda. Det er særleg viktig å finne varige løysingar for flyktningar, returnerte og internt fordrivne som varetek rettane deira.

– Noreg har i lang tid jobba langs fleire spor i Afghanistan. Heilskapleg tilnærming er heilt nødvendig, slik at humanitært arbeid, utvikling og politisk innsats trekkjer i same retning til beste for det afghanske folket. Vi vil halde fram å arbeide for dette, også internasjonalt, seier Tvinnereim.

Taliban har sidan maktovertakinga i 2021 innført restriksjonar og tiltak som rammar den afghanske befolkninga hardt, særleg kvinner og jenter. Forboda mot afghanske kvinnelege tilsette i organisasjonar og FN skaper store utfordringar for den humanitære innsatsen. Trass i dette melder hjelpeorganisasjonane at kvinner og jenter får hjelp.