Reinhaldsarbeidarar tilbake til Forsvaret

Regjeringa vedtok allereie i januar at Forsvarsbygg skulle ha ansvaret for reinhald i forsvarssektoren. Reinhaldet omfattar om lag ein million kvadratmeter, og blir i dag varetekne av fleire private aktørar. Omfanget samla sett utgjer ein av dei største reinhaldsleveransane i Noreg, og gjeld mange tilsette.

Avgjerda om å tilbakeføra reinhaldet til forsvarssektoren er ei oppfølging av Hurdalsplattforma der det blir stadfesta at regjeringa vil «Sørgje for at reinhaldet i heile forsvarssektoren igjen blir organisert i Forsvarets eigen regi».

Regjeringas føringar er at dagens effektivitetsnivå skal haldast oppe, med mål om å få ei løysing som er betre for sektoren totalt sett.

- Eg er trygg på at Forsvarsbygg finn gode løysingar som varetek krava til effektivitet og kvalitet. Medverknad og involvering av organisasjonane og dei tilsette er viktig i det arbeidet, seier Gram.

Målet er at alt dagleg reinhald er tilbakeført til Forsvarsbygg i løpet av 2024. 

- Me skal skapa ein god arbeidsplass for reinhaldsarbeidarane og reinhaldsleiarane. Tenesta skal også tilfredsstilla  forventninga brukarane har til kvalitet og vera berekraftig over tid, seier direktør Forsvarsbygg Thorbjørn Thoresen.

 

Bakgrunn:

Regjeringa har vedteke at Forsvarsbygg får ansvaret for reinhaldet i forsvarssektoren som del av ei heilskapleg eigedomsforvaltning.

Forsvarsbygg skal etablera ein stor reinhaldsorganisasjon med meir enn 400 tilsette. Oppbygginga vil skje med basis i dei reinhaldsressursane som finst i sektoren i dag.  

For meir bakgrunnsinformasjon, sjå: www.forsvarsbygg.no/renhold