Dette er finalistane til utmerkingane for sunnare kosthald
Nyheit | Dato: 05.12.2023 | Helse- og omsorgsdepartementet
Aktørar i matvarebransjen konkurrer om utmerkingar for særleg god innsats i arbeidet for eit sunnare kosthald. Tysdag kunngjorde helse- og omsorgsminister Ingvild Kjerkol finalistane.
Matvarebransjen har forplikta seg til å legge til rette for sunne kosthaldsval gjennom intensjonsavtala for eit sunnare kosthald (helsedirektoratet.no).
Utmerkingane for sunnare kosthald er ein honnør til aktørar som gjer ein særleg innsats i dette arbeidet, og det blir delt ut prisar i kategoriane «sunnare produkt» og «sunnare marknadsføring».
– Det blir lagt ned mykje arbeid for å fremme dei sunnare vala og gjere kvardagsprodukta sunnare. Matvarebransjen er ein viktig samarbeidspartnar for oss på dette området, seier helse- og omsorgsminister Ingvild Kjerkol.
Dette er finalistane
Det er kome inn sju nominasjonar i kategorien «sunnare produkt» og åtte nominasjonar i kategorien «sunnare marknadsføring». Nominasjonane er vurderte av ein eigen jury, som også har plukka ut finalistane. Blant fleire gode kandidatar, er dette finalistane.
Sunnare produkt
Finalistane i kategorien «sunnare produkt» er:
- Fjordland – Fisk i ferdigretter
- TINE – Mindre fett i Norvegia Original
- REMA 1000 – Grovt og godt
Grunngiving:
Dette er produktinnovasjonar som skal bidra til at forbrukar får i seg meir fisk og grove kornprodukt, og mindre metta feitt.
Ved å redusere innhaldet av metta fett i eit kvardagsprodukt som Norvegia når ein mange, også dei som ikkje er så opptatte av kosthald. Dette kan gjere ein forskjell for folkehelsa, og bidra til å redusere sosiale forskjellar i kosthald.
At det er eit stort utval å velje mellom, både av ferdigrettar og brød, kan bidra til at fleire spis meir av desse produkta, og dermed får i seg meir fisk og grove kornprodukt som er eit mål under intensjonsavtala.
Sunnare marknadsføring
Finalistane i kategorien «sunnare marknadsføring» er:
- Opplysningskontoret for frukt og grønt – Smaksdetektiv, 5 om dagen barnehage
- Meny – Fiskeknappen
- KIWI – Momskutt på fisk
Grunngiving:
Dei to førstnemnde finalistane i denne kategorien bidrar til auka kunnskap om mat myndigheitene ønsker at vi et meir av som frukt og bær, grønsaker og fisk og sjømat. Desse to finalistane har også valt å sette søkelyset på dei unge. Som vi veit blir matvanar danna tidleg, og begge initiativa appellerer til leik, læring og nysgjerrigheit hos dei minste.
Det tredje tiltaket viser at prisreduksjonar i kombinasjon med effektiv kommunikasjon har effekt på folk si åtferd når dei handlar. Lågare prisar på fisk fører til at fleire kjøper fisk oftare, som er i tråd med intensjonsavtala sine målsettingar.
- Kristin Hollung, avdeling mat og helse, Nofima, juryleiar
- Lars Erling Olsen, Institutt for markedsføring, Handelshøyskolen BI
- Nanna Lien, avdeling for ernæringsvitskap, Universitetet i Oslo
- Annechen Bahr Bugge, Forbruksforskningsinstituttet SIFO, OsloMet
Helsedirektoratet har sekretariatsfunksjon for utmerkingane, men sit ikkje i juryen.
Vinnarane blir kåra i februar 2024
Vinnarane av intensjonsavtala sine utmerkingar blir kåra i februar 2024. Stad og tid blir annonsert seinare.
– Eg gler meg til å dele ut denne viktige prisen, og til å vidareføre det gode samarbeidet med matvarebransjen, seier Kjerkol.