Endring i skatteforvaltningsforskrifta for innhenting av kontrollopplysningar gjennom DSOP
Nyheit | Dato: 20.01.2025 | Finansdepartementet
Finansdepartementet ber Skattedirektoratet fastsetje endringar i skatteforvaltningsforskrifta for å mogleggjere automatisert innhenting av informasjon gjennom ei teneste som er utvikla i prosjektet Digital samhandling offentleg privat Kontrollinformasjon (DSOP Kontroll). Endringa gjeld berre korleis opplysningar kan innhentast, og medfører ingen endringar i kva opplysningar som kan innhentast.
Finansdepartementet sende 19. september 2023 på høyring eit framlegg til ei ny føresegn i skatteforvaltningsforskrifta om automatisert innhenting av opplysningar frå bankar og andre finansføretak. Opplysningane vert allereie utveksla manuelt mellom skattemyndigheitene og finansføretak i dag. Ei automatisering av prosessen effektiviserer innhentinga og legg til rette for at Skatteetaten kan gjennomføre fleire kontrollar.
Det kom mange gode innspel i høyringa, mellom anna trongen for sterkare personvern ved automatisert informasjonsinnhenting. Samanlikna med framlegget som var på høyring, inneheld den endelege forskrifta enkelte justeringar i tekniske og organisatoriske tiltak for ytterlegare å styrkje personvernet. Det vert mellom anna lagt fleire avgrensingar på kven hjå skattemyndigheitene som skal ha tilgang til løysinga.
Departementet meiner forskrifta vil sørgje for trygg innhenting av informasjon i tråd med personvernomsyn.
DSOP vart etablert i 2016 av Brønnøysundregistera, Finans Norge og Skatteetaten, med NAV og politiet som partnarar frå 2018. Samarbeidet fokuserer på å effektivisere informasjonsutveksling. Den mest kjende løysinga er samtykkebasert lånesøknad.
I prosjektet DSOP Kontrollinformasjon er det utvikla ei automatisert oppslagsteneste for å innhente informasjon frå bankar og finansføretak til Skatteetaten, NAV og politiet. Føremålet er å effektivisere utlevering av opplysningar. Den tekniske løysinga er nesten ferdig utvikla.