Enklare førarkortreglar for utanlandske arbeidarar
Historisk arkiv
Publisert under: Regjeringen Solberg
Utgjevar: Samferdselsdepartementet
Pressemelding | Nr: 181/18 | Dato: 15.11.2018
– Regjeringa er opptatt av å gjere reglane enklare på mange område. Vi vil no gjere det enklare å bruke førarkort frå land utanfor EØS for personar som arbeider mellombels i Noreg. Dette vil gjere det enklare både for verksemder som treng slik arbeidskraft og for dei som gjer slikt arbeide, samstundes som vi tek i vare trafikktryggleiken, seier samferdselsminister Jon Georg Dale.
Han har no bede Vegdirektoratet om å utvide perioden førarkort frå land utanfor EØS kan bli brukt i Noreg for personar som oppheld seg i Noreg mellombels, frå tre månader til seks månader for dei med arbeidsløyve. Det vil gi betre samanheng til reglane om arbeidsløyve i slike tilfelle, og vil gjere at personar med slikt løyve kan ta arbeid kor ein del av arbeidet krev køyring. Dette vil vere aktuelt mellom anna i sesongnæringar innan turisme.
Vegdirektoratet vil no utarbeide og sende på høyring framlegg om naudsynte endringar i regelverk. Endringar vil kunne vere på plass til sommaren 2019.