Fjernar overpris på tenestene i Brønnøysundregistera

– Dersom brukarane betaler meir i gebyr enn det det kostar å produsere dei aktuelle tenestene, inneber det ei skjult skattlegging. Vårt forslag om å fjerne overprising i Brønnøysundregistera bidreg til ein meir rettferdig skatte- og avgiftspolitikk, seier næringsminister Cecilie Myrseth.

Hovuddelen av tenestene frå Brønnøysundregistera er finansierte av brukarane gjennom gebyr. Brønnøysundregistera har over tid hatt eit høgare krav til kva dei samla må hente inn av gebyr enn det kostar å produsere dei aktuelle tenestene. Dette er i strid med føresegnene om statleg brukarfinansiering.

Brukarene skal ikkje betale meir enn det kostar

Når regjeringa no foreslår å redusere gebyrinntektskravet, vil prisen på dei gebyrbelagde tenestene også i Lausøyreregisteret følge prinsippet om at gebyra ikkje skal overstige kostnaden ved å produsere og levere tenestene.

Lausøyreregisteret vart i 2023 overført til den nye registerplattforma i Brønnøysundregistra. Dette gir store vinstar i form av sikrare løysingar, hurtigare saksbehandling og betre opplevingar for brukarane. Samtidig kostar drift og forvalting av nye IT-løysingar meir enn dei gamle.