Fleire søkjer seg til utanrikstenesta

Det var 541 søkjarar til aspirantkurset. Dette er ein auke frå i fjor, då det var 401 søkjarar.

I tillegg er det ein auke i talet på søkjarar til administrative aspirantar, det såkalla admirantopptaket. I år var det 198 søkjarar, samanlikna med 121 i fjor.

Til saman er auken i det samla søkjartalet på over 40 prosent samanlikna med 2024.

– Vi er glade for at utanrikstenesta er ein attraktiv arbeidsplass som tiltrekkjer seg mange søkjarar. I den verda vi står overfor treng vi dyktige menneske som ønskjer å jobbe for norske interesser, også under stadig meir krevjande forhold ved norske utanriksstasjonar. Det viktigaste for oss er likevel ikkje talet på søkjarar, men at vi får motiverte, fagleg dyktige og robuste kandidatar som ønskjer å fremje norske interesser i utlandet, seier utanriksråd Torgeir Larsen.

Det vil i år takast opp inntil 25 aspirantar og admiranter. Aspirantar vil mellom anna jobbe med heile breidda i norsk interessefremje. Admiranter vil ha ansvar for administrative, økonomiske og konsulære oppgåver.

Etter oppstart i departementet går gjennom både admiranter og aspirantar eit 18 månaders opplæringsprogram i UD. Deretter vil dei som hovudregel tenestegjere ved to etterfølgjande utanriksstasjonar, det vil seie ambassadar, generalkonsulat eller delegasjonar til internasjonale organisasjonar.

For dei fleste vil første stasjonering vere ved ein utanriksstasjon med krevjande bu- og leveforhold («hardship»). Aspirantar og admiranter frå nyare kol tenestegjer i dag mellom anna i Islamabad, Jakarta, Kinshasa, New Delhi, Riyadh, Santiago og Tblisi.

Vidare prosess

I slutten av denne veka vil aktuelle kandidatar til gruppeopptaka inviterast til å gjennomføre tre nettbaserte testar. For søkjarar til admirantopptaket vil vidare rekrutteringsprosess mellom anna bestå av to intervjurundar. Prosessen er forventa sluttført i slutten av mars.

For søkjarar til aspirantopptaket vil om lag 80 kandidatar, basert på testresultat, bakgrunn, men også kunnskap og erfaring frå Noreg som samfunn, inviterast til ein skriftleg prøve i februar. I slutten av mars vil 30 kandidatar inviterast til ulike testar og intervju. Prosessen vil bli sluttført i april.

Kandidatar som blir tilbodne opptak til aspirant- eller admirantkurset vil ha oppstart i januar 2026.