Regjeringa foreslår lovendringar for vass- og avløpsanlegg
Nyheit | Dato: 21.03.2025 | Klima- og miljødepartementet
Regjeringa vil betre drifta av vass- og avløpsanlegg. Lovendringane skal bidra til meir effektiv drift av anlegga, og forebygge forureining og skader frå styrtregn og auka vassmengder.
– Befolkningsvekst og klimaendringar med meir styrtregn gjer at dagens avløpsanlegg ikkje lenger klarer å handtere alt overvatnet. Dette aukar risikoen for forureining og skadar på bygningar og infrastruktur. Kommunen får nå eit tydeleg verktøy i forureiningslova for å kople overvatn frå avløpssystemet slik at det kan handterast trygt lokalt. I tillegg foreslår vi ein ny vass- og avløpsanleggslov som skal bidra til meir effektiv drift av vass- og avløpsanlegg, seier klima- og miljøminister Andreas Bjelland Eriksen.
Regjeringa foreslår endringar i forureiningslova og ny lov om vass- og avløpsanlegg. Endringane følgjer opp tilrådingane frå Overvassutvalet (NOU 2015:16 Overvann i byer og tettsteder – Som problem og ressurs).
Endringane i forureiningslova inneber at kommunen kan fjerne overvatn frå overbelasta avløpsanlegg. Kommunen får nå rett til å påleggje innbyggjarar som mottek kommunale avløpstenester, å kople overvatn frå det kommunale avløpsanlegget så lenge det finst andre forsvarlege måtar å handtere overvatnet på. Dersom det ikkje finst naturlege løysingar for overvatnet, kan kommunen påleggje innbyggjarar å sørgje for tiltak.
Det kan vere å handtere overvatnet på eigen eigedom eller leie overvatnet til eit anna avløpsanlegg eller alternativ avrenningsveg. Dette kan til dømes vere å etablere ei regntønne for å ta unna vatn frå takrenner. Slike tiltak kan ikkje vere uforholdsmessig kostbare. Regjeringa foreslår òg ein tydelegare definisjon av avløpsanlegg og overvatn.
I tillegg foreslår regjeringa ein ny vass- og avløpsanleggslov. Den nye lova vil erstatte lova frå 16. mars 2012 om kommunale vass- og avløpsanlegg.
– Hendingar som gir unødig tap av drikkevatn, fare for forureining og stans i vass- og avløpstenestene er uheldig. Endringane i lova lovfestar rettigheiter og plikter for kommunen og innbyggjarane. Dette gir større rettstryggleik for alle som brukar kommunale vass- og avløpstenester, seier klima- og miljøminister Andreas Bjelland Eriksen.
FAKTA
Om lovendringane
Dagens føresegner i vass- og avløpsanleggslova blir i stor grad vidareførte i ny lov. I tillegg fastset lova nye plikter og rettar for både eigar og brukarar av kommunale vass- og avløpsanlegg. Kommunen får ei klar plikt til å levere vass- og avløpstenester til alle abonnentar med tilknyting. Abonnentane får ei plikt til å bruke tenestene på ein måte som ikkje øydelegg for andre brukarar. Brot på reglane i lova kan sanksjonerast. Føresegnene gjer reglane meir føreseielege, samtidig som at klagetilgang i forvaltningslova gir større rettstryggleik.