Føreslår meir i pensjon til uføre pensjonistar

– Alle skal ha ein verdig alderdom i Noreg, sier arbeids- og inkluderingsminister Tonje Brenna.

Regjeringa føreslår å gje eit skjermingstillegg i alderspensjonen også til årskulla 1954-1962, tilsvarande det som vart gitt til årskullet fødd 1953. Regjeringa vil difor auke løyvinga til alderspensjon med 393 millionar kroner.

– Eg er oppteken av at uføre sin alderspensjon skal halde tritt med alderspensjonen til folk i arbeid. Dette sikrar at dei som ikkje kan arbeide får ein anstendig pensjon, seier Brenna.

Forslaget følgjer opp Hurdalsplattformens punkt om å gjeninnføre skjermingstillegg for uføre som vert alderspensjonistar, slik at dei vert skjerma for delar av den såkalla levealdersjusteringa. Levealdersjusteringa inneber at arbeidsføre må stå lenger i arbeid for å få like høg alderspensjon som eldre årskull, noko uføre ikkje har moglegheit til.

Regjeringa tok initiativ til, og har fått på plass eit breitt forlik på Stortinget som styrkjer den sosiale profilen i pensjonssystemet. Forliket inneber at det er brei parlamentarisk semje om at uføre sin alderspensjon skal styrkast gjennom eit skjermingstillegg i tråd med regjeringa sitt forslag, samt auka oppteningsalder og auka øvre aldersgrense for mottak av uføretrygd.