Høyring – meirverdiavgift ved handel av tenester over landegrensene

Meirverdiavgift ved internasjonal handel byggjer på destinasjonsprinsippet. Det betyr at varer og tenester som vert handla internasjonalt, skal skattleggjast i det landet der forbruket av vara eller tenesta skjer. I dag vert dette ikkje fullt ut gjennomført når det gjeld internasjonale føretak sine kjøp av mellom anna IT-tenester og rådgjevingstenester.

– Skatteetaten har over tid observert at internasjonale føretak utnyttar svakheitene ved reglane. Slik får dei eit konkurransefortrinn samanlikna med reint nasjonale føretak. Dette er ein situasjon vi ikkje kan ha, seier statssekretær Ellen Reitan.

Dette vert særleg utnytta av internasjonale finansføretak, det vil seie føretak som er etablert i meir enn eitt land, til dømes eit selskap med hovudkontor i Sverige og ein filial i Noreg. Viss hovudkontoret i Sverige inngår avtalen om kjøp av tenesta, kan selskapet i dag unngå avgiftsplikt i Noreg sjølv om tenesta er til bruk av filialen i Noreg. Dei internasjonale føretaka oppnår med det lågare kostnader på innsatsfaktorane sine enn reint norske føretak som konkurrerer i den same marknaden.

Framlegget byggjer på anbefalingar frå OECD, og skal sikre at kjøp av tenester som er til bruk i Noreg, vert behandla likt uavhengig av kor tenestene vert kjøpte.

– Lik behandling av verksemder som konkurrerer i den same marknaden, er eit grunnleggjande omsyn ved utforminga av meirverdiavgiftsreglane. Framlegget vil bidra til å rette opp nøytraliteten i systemet. Dette er viktig for konkurransen i finansmarknaden, seier Reitan.

I tillegg vert det gjort framlegg om å utvide retten til frådrag for inngåande meirverdiavgift på fjernleverbare tenester som er til bruk utanfor Noreg. Denne delen av framlegget er viktig for å hindre at internasjonale føretak får ei endeleg avgiftsbelasting i Noreg på tenester som er til bruk utanfor Noreg.

Framlegget er på svært usikkert grunnlag berekna å gje eit årleg proveny på om lag 800 mill. kroner.

Fristen for å gje høyringsfråsegn er 21. juni 2025. For å gje høyringsfråsegn, gå til høyringa på www.regjeringen.no og bruk den digitale løysinga for høyringsfråsegn ved å klikke på «Send inn høyringssvar».