Jublar for EUs forsterka klimamål

- Dette er svært godt nytt. Både statsminister Erna Solberg og eg har ved fleire høve oppfordra EU til å forsterke målet sitt til 55 prosent. Det er viktig for konkurransekrafta til Europa i det grøne skiftet, og det er viktig for gjennomføringa av Noreg sitt eige høge klimamål. EU er verdas største marknad, og tøffe klimamål der gjer det enda meir lønnsamt å satse på ny klimateknologi, seier klima- og miljøminister Sveinung Rotevatn (V).

Noreg var eit av dei første landa i verda til å melde inn eit nytt og forsterka klimamål under Parisavtalen. Det gjorde vi allereie i februar i år. Det forsterka klimamålet til Noreg er å redusere utsleppa med minst 50 prosent og opp mot 55 prosent samanlikna med 1990-nivå. Norge har samstundes arbeida aktivt for at EU skal auke klimamålet sitt for 2030 til 55 prosent.

- Europa har leiartrøya i den globale klimakampen. Avgjerda til EU er viktig for at andre store utsleppsnasjonar skal komme etter. Noreg er tett integrert i klimapolitikken til EU, og dette gjer det enklare å få norske utslepp til å fortsette nedover slik dei har gjort under denne regjeringa, seier Sveinung Rotevatn.

Som følgje av at EU forsterkar klimamålet sitt, vil dei også endre klimaregelverket for å sikre at dei når det nye og forsterka målet. Europakommisjon vil sjå på om dei skal endre kva for område i samfunnet som regulerast av dei ulike regelverka.

Det nye regelverket til EU vil òg få tyding for arbeidet Noreg gjer med å få ned klimagassutsleppa.

EU-kommisjonen vil legge fram eit forslag til endra klimaregelverk i juni 2021. Deretter skal det diskuterast og handsamast i Rådet og Parlamentet før det blir vedtatt i EU.

Det vil difor gå fleire år før endringar i EUs nye klimaregelverk vil vere klart, og det vil kan hende ikkje tre i kraft før i 2025/26.