Tilleggsnummer til Statsbudsjettet 2022
Kommunane får 4,5 milliardar meir i frie inntekter
Pressemelding | Dato: 08.11.2021 | Kommunal- og distriktsdepartementet
Folk skal kunne leve gode liv uansett kvar i Norge dei bur. Regjeringa foreslår ein vekst på ytterlegare 2,5 milliardar kroner i kommunesektoren sine frie inntekter i 2022. Dette kjem på toppen av Solberg-regjeringa sitt forslag. – Eg er glad for at kommunane no får musklar og handlingsfridom til å gje innbyggjarane over heile landet gode tenester, seier kommunal- og distriktsminister Bjørn Arild Gram.
Regjeringa er oppteken av at kommunane og fylkeskommunane skal ha gode rammer og ein føreseieleg økonomi, slik at dei kan lukkast med dei krevjande oppgåvene dei skal løyse for å gje folk ein betre kvardag.
I tilleggsnummeret til statsbudsjettet aukar regjeringa dei frie inntektene til kommunane med 2,5 milliardar kroner sammenlikna med den forrige regjeringa sitt budsjett. Av veksten i frie inntekter, foreslår regjeringa at to milliardar går til kommunane, medan 500 millionar går til fylkeskommunane. Veksten blir til saman 4,5 milliardar kroner.
Regjeringa har ved fastsetjing av veksten i frie inntekter tatt omsyn til kommunane sine kostnader knytt til auka grunnbemanning og fleire pedagogar i barnehagane dei siste åra.
Regjeringa foreslår eit nytt tilskott innanfor veksten i frie inntekter på 500 000 kroner per kommunale grunnskule.
− Det vil gi kommunane insentiv til å satse på ein desentralisert skulestruktur, seier Gram.
På toppen av veksten i ramma til kommunana, foreslår regjeringa å reversere Solberg-regjeringa sitt kutt på 300 millionar kroner i tilskotet til ressurskrevjande tenester.
− Dette vil styrke økonomien i kommunane og gjere dei i stand til å gi eit betre tilbod til innbyggjarar som har krav på omfattande helse- og omsorgstenester, seier kommunal- og distriktsminister Bjørn Arild Gram.
Fylkesvis oversikt
- 533 millionar kroner meir i frie inntekter til Agder neste år
- 500 millionar kroner meir i frie inntekter til Innlandet neste år
- 527 millionar kroner meir i frie inntekter til Møre og Romsdal neste år
- 439 millionar kroner meir i frie inntekter til Nordland neste år
- 885 millionar kroner meir i frie inntekter til Oslo neste år
- 884 millionar kroner meir i frie inntekter til Rogaland neste år
- 458 millionar kroner meir i frie inntekter til Troms og Finnmark neste år
- 763 millionar kroner meir i frie inntekter til Trøndelag neste år
- 691 millionar kroner meir i frie inntekter til Vestfold og Telemark neste år
- 1 127 millionar kroner meir i frie inntekter til Vestland neste år
- 2 002 millionar kroner meir i frie inntekter til Viken neste år
Kommunal- og moderniseringsdepartementet sin pressetelefon: 22 24 25 00