Kulturløft for å få fleire barn og unge til å delta

– Regjeringa prioriterer arbeidet med å redusere utanforskap, inkludere fleire og bygge gode tilbod i heile landet. I tillegg til at det har stor verdi i seg sjølv å drive med kulturaktivitetar har det også god førebyggjande effekt.. Derfor satsar vi no på eit mangfald av aktivitetar, seier kultur- og likestillingsminister Lubna Jaffery.

Målet er at fleire barn og unge får moglegheit til å delta i idrett, kultur og fritidsaktivitetar uavhengig av kven dei er, kvar dei bur, eller foreldra si lommebok.

– Dessverre er det slik at barn som kjem frå familiar med vedvarande lavinntekt deltek mindre enn andre i kulturlivet. Vi ønsker å gi fleire moglegheita, og denne satsinga er eit viktig bidrag for å inkludere alle, seier Jaffery.

Det blir sett av pengar til ei rekke ulike formål. Mellom anna får Norges Musikkorps Forbund pengar til deira innsats for å behalde fleire unge i korpsa. Regjeringa vil også at fleire skulelevar skal kunne oppleve å oppleve teater av høg kvalitet gratis i sitt lokale kulturhus og set av to millionar kroner til Riksteatrets billettfond. Fem millionar kroner til innkjøp av dataspel ved trygge og inkluderande møteplassar for dataspelkulturen for barn og unge.

– Regjeringa satsar på dataspel fordi vi veit kor viktig aktiviteten er for mange barn og unge, og vi ønsker å leggje til rette for at aktiviteten kan skje i fellesskap og på gode, offentlege møteplassar, seier Jaffery

Fordeling av 55 millionar kroner til deltaking for barn og unge

• 10 millionar kroner vidareførast til oppfølging av handlingsplanen «Alle inkludert!»
• 10 millionar kroner til Ungdom og Fritids Fond
• 6 millionar kroner til Norges Musikkorps Forbund, til Ungdomsløftet
• 2 millionar kroner til Riksteatrets billettfond - ei ordning for fribillettar for skuleelevar
• 2 millionar kroner til Tigerstadsteatret, til drifta
• 5 millionar kroner til Filmfondet, til innkjøp av dataspel
• 20 millionar til leselyst (eiga pressemelding)