Statsbudsjett 2025
Legg til rette for norsk deltaking i European Chips Act
Pressemelding | Dato: 07.10.2024 | Nærings- og fiskeridepartementet
Regjeringa foreslår å løyve 40 millionar kroner årleg til norsk deltaking i EU si satsing på halvleiarar.
– Norsk deltaking i Chips Act skapar moglegheiter for norske verksemder i verdikjeda for halvleiarteknologi og er viktig for norsk konkurranseevne og beredskap, seier næringsminister Cecilie Myrseth.
Halvleiarteknologi er strategisk viktig for mange industrielle verdikjeder som 5G og kunstig intelligens. Norsk halvleiarindustri er ein del av ei global verdikjede som vert påverka når det skjer forstyrringar i marknaden.
Noreg har ein sterk forskingsbase for mikrobrikker, med selskap som leverer produkt internasjonalt. Noreg har også relevant material- og prosesskunnskap og produksjon av silisium.
– Dette er ein kunnskaps- og forskingsintensiv industri som vi heier på og som er viktig for ei rekkje bransjar. Difor foreslår regjeringa ei løyving på 40 millionar kroner per år i perioden 2025-2027. Midla skal dekkje norsk deltaking i forskings- og innovasjonssamarbeidet innanfor Chips Act, seiar Myrseth.
Regjeringa arbeider og med ei vurdering av korleis European Chips Act samla kan innarbeidast i EØS-avtalen, som i siste instans må forankrast i Stortinget.
Om European Chips Act
EU vedtok i september i fjor ei ny rettsakt om European Chips Act, med formål å styrkje konkurranseevnen til Europa og sikre sjølvberging når det gjeld halvleiarteknologi og -bruk.
Chips Act omfattar tiltak i tre søyler:
Pillar I — The Chips for Europe Initiative, som omfattar støtte til forsking og innovasjon på feltet – følgt opp gjennom partnarskapet Chips Joint Undertaking (JU)
Pillar II — Security of Supply, som omfattar støtte til produksjon av halvleiarar i dei deltakande landa
Pillar III — Monitoring and Crisis Management, som omfattar overvaking av verdikjeda i dei deltakande landa og felles beredskapsmekanismar dersom det skulle oppstå forsyningsproblem
Det øvste styringsnivået i Chips Act omfattast av European Semiconductor Board, der Noreg deltek med observatørstatus.
Forskings- og innovasjonssamarbeidet i pilar 1, finansierast av EU-programma Horisont Europa og Digital, som Noreg allereie deltek i og betaler for, og norske aktørar har difor i prinsippet allereie.