Miljøinnsatsen til bønder held fram
Nyheit | Dato: 14.03.2025 | Landbruks- og matdepartementet
Søknadene til Regionale miljøtilskot i jordbruket er ferdig handsama. Om lag 23 000 søkjarar får fordelt over 1,1 milliard kroner på kontoane sine denne veka.
Stadig fleire bønder utfører miljøtiltak i jordbruket, viser statistikk. Auken frå i fjor er på om lag 500 søknader. Utbetalingane og arealmengda det blir utført på aukar jamt og trutt.
Regionale miljøtilskot i jordbruket er ei ordning som skal bidra til auka miljøinnsats i jordbruket. Utbetalinga er for miljøtiltak utført i 2024.
- Les meir om regionale miljøtilskot i jordbruket hjå Landbruksdirektoratet Den gode miljøinnsatsen til bøndene held fram - Landbruksdirektoratet
Fylka som har store kornareal brukar store delar av midlane på tiltak som reduserer avrenning til vatn. I Østfold, Buskerud, Oslo og Akershus går 70 prosent av midlane til tiltak som reduserer avrenning til vatn. I Innlandet blir 27 prosent av midlane brukte til å redusera avrenning til vatn, og 28 prosent til å ivareta kulturminne og kulturmiljø.
Frå Rogaland i sør til Møre og Romsdal i nord, går mykje av midlane til tiltak som tek vare på kulturlandskap, kulturminne og kulturmiljø, og til tiltak som reduserer utslepp av ammoniakk og lystgass til luft.
I Rogaland, Trøndelag og Nordland går rundt ein femtedel av midlane til å ta vare på det biologiske mangfaldet knytt til jordbruket. I Agder og Troms og Finnmark går rundt 40 prosent av midlane til å skjøtta kulturlandskapet.