No skal heile Noreg eksportere meir

- Vi skal auke eksporten utanom olje og gass med 50 prosent innan 2030. For å nå dette målet prioriterer vi pengar til å utvikle strategiske eksportsatsingar for utvalde sektorar. Vi sørgjer òg for at Eksfin har tilstrekkelege musklar slik at norske eksportørar får like gode konkurransevilkår som eksportørar i andre land, seier næringsminister Jan Christian Vestre (Ap).

Regjeringa foreslår å auke løyvinga til eksportsatsingar med 45 millionar kroner i 2024. Pengane skal gå til å gjennomføre eksportsatsingane under eksportreforma Heile Noreg eksporterer. Totalt foreslår regjeringa å løyve 94,7 millionar kroner til satsingar på eksportfremme i 2024.

Pengane skal brukast til:

• å styrkje Innovasjon Noreg og verkemiddelapparatet sitt nærvære internasjonalt
• å styrkje NORWEP sine aktivitetar som fremjer internasjonalisering av den norske havvindnæringa
• til eksportprogram
• og til felles profileringsmateriale

Så langt har regjeringa lansert to eksportsatsingar på havvind og på maritim næring, basert på forslag frå Nasjonalt eksportråd. Satsingane er prosjekt som kjem i tillegg til det eksisterande eksportarbeidet.

Dei tre nye neste satsingane som kjem, vert for design og ferdigvareindustrien, helseindustrien og reiselivsnæringa. Nasjonalt eksportråd ga i sommar råd om konkretisering av ei satsing innan design og ferdigvareindustrien, og arbeider med å ferdigstille råda sine om korleis desse satsingane skal gjennomførast.

Styrking av det eksportretta verkemiddelapparatet

Regjeringa foreslår òg å auke garantirammene under Eksportfinansiering Noreg (Eksfin) med ti milliardar kroner, med høve til å auke dei med ytterlegare ti milliardar dersom det vert naudsynt grunna valutasvingingar, slik at Eksfin framleis skal kunne bidra til den grøne omstillinga i næringslivet.

I fjor fekk Eksfin eit breiare mandat som inneber at dei kan gi lån til eksportretta investeringar og finansiere klimaprosjekt med eksportpotensial i Noreg. Det vert mellom anna opna for finansiering av botnfast vindkraftprosjekt til havs, på lik line med flytande vindkraftprosjekt.