Noreg fornya utdanningsavtale med Brasil

Forskings- og høgare utdanningsminister Oddmund Hoel signerte 20. september ein fornya versjon av den bilaterale avtalen mellom KD og det brasilianske utdanningsdepartementet. Avtalen blei oppretta i 2016, og den fornya versjonen bekreftar at Noreg og Brasil ønsker tettare samarbeid innan utdanning.

– Utdanning er ein nøkkel for løyse globale utfordringar. Derfor er eg glad for at vi no styrker samarbeidet med Brasil på dette området. Vi veit at fleire norske utdanningsinstitusjonar ønsker å bygge sterke og langsiktige partnarskap med Brasil. I tillegg reiser stadig fleire norske studentar til Brasil på utveksling. Vi vil gjerne ha meir slik utveksling – både til og frå Noreg. Det legg den fornya avtalen til rette for, seier forskings- og høgare utdanningsminister Oddmund Hoel (Sp). 

Følger opp Panorama-strategien

Regjeringa sin Panorama-strategi legg prioriteringar og føringar for det bilaterale samarbeidet med Brasil. 

Regjeringa ønsker å fremje målretta bilateralt høgare utdannings-, forskings- og innovasjonssamarbeid med Brasil, ved å legge til rette for:

1. ei langsiktig styrking av faglege kontaktflater mellom institusjonar i Noreg og strategilanda
2. meir systematisk kontakt og samordning på norsk side, på tvers av ulike departement sine ansvarsområde og
3. auka kunnskap og meir tilgjengeleg informasjon som kan påverka moglegheitene for eit godt samspel mellom høgare utdanning, forsking og næringsliv.

For å vidareutvikle samarbeidet med Brasil har i tillegg Forskingsrådet, HK-dir og Innovasjon Noreg eit ansvar for å bidra til godt samspel mellom utdanning, forsking og næringsliv i bilateralt samarbeid. Her speler mellom anna UTFORSK-programmet  ei viktig rolle.

• Memorandum of Understanding: On cooperation in the field of higher education and training (lenke kommer)
• Noreg og Brasil har òg ein avtale om forskingssamarbeid, som blei fornya i 2021