Norskstøtta FN-prosjekt har forhindra oljeutslepp i Raudehavet
Nyheit | Dato: 11.08.2023 | Utanriksdepartementet
– Eg er svært glad for at Noreg har bidradd til å hindre ein alvorleg miljøkatastrofe i Raudehavet, som ville ramma folk og levebrød i ein allereie sårbar region, seier utanriksminister Anniken Huitfeldt.
Sidan konflikten i Jemen braut ut i 2015 har ein gammal oljetankar vore forlaten utanfor Jemen utan tilsyn. FN har lenge åtvara om at «FSO Safer» stod i fare for å byrje å leke, og FNs utviklingsprogram (UNDP) anslår at 17 millionar menneske kunne vorte påverka av ein oljelekkasje. Eit mogleg oljeutslepp frå «FSO Safer» ut i Raudehavet ville fått enorme konsekvensar for Jemen og regionen.
FN kunngjorde i dag at overføringa av over ein million fat råolje frå oljetankaren til ein erstatningstankar er fullført. Ei rekkje land har støtta UNDPs arbeid med å få overført olja, inkludert Noreg som har bidrege med 35 millionar kroner.
– Eit utslepp ville ha fått økologiske, miljømessige og humanitære konsekvensar. I tillegg kunne internasjonal skipsfart i Raudehavet ha vorte direkte ramma, seier utanriksministeren.
Prosjektet har vore svært krevjande på grunn av den pågåande konflikten i Jemen. Erstatningsskipet er ei mellombels løysing og prosjektet er ikkje avslutta.