Ny FOU-rapport om utfordringane i bustadmarknaden
Pressemelding | Dato: 29.08.2023 | Kommunal- og distriktsdepartementet
– Pris- og renteaukinga rammar på ulike måtar, uansett kor ein bur i landet. Derfor er det behov for ein aktiv bustadpolitikk for å møte utfordringane både i bygd og by. Folk skal kunne bu, arbeide og leve gode liv i heile landet, seier kommunal- og distriktsminister Sigbjørn Gjelsvik (Sp).
Aukinga i konsumprisar, renter og byggekostnader gir utfordringar for mange i bustadmarknaden. Husstandar med låg inntekt blir ekstra hardt ramma, ifølge ein ny rapport Samfunnsøkonomisk analyse AS (SØA) har gjort for Husbanken(PDF).
– Rapporten gjev nyttig kunnskap, og er med på å underbygge eit bilete som allereie er kjent og som har utvikla seg over tid. Derfor prioriterte også Senterpartiet og Arbeiderpartiet då vi kom i regjering umiddelbart å styrke bustadpolitikken, auka låneramma til Husbanken og iverksette ei rekke bustadpolitiske initiativ, seier Gjelsvik (Sp).
Rapporten frå SØA syner mellom anna at:
- auka byggekostnadar og usikkerheit om framtidige bustadprisar er hovudforklaringane på det sterke fallet i bustadbygginga som vi opplever i dag.
- husstandar med låg inntekt og sårbar økonomi blir ekstra hardt ramma. Auka levekostnadar som følgje av auka prisvekst, gjer at det blir meir krevjande å komme inn på bustadmarknaden
- auka byggekostnader gjer det meir krevjande for kommunar å auke tilbodet av kommunale bustader, sjølv om behovet kan vere stort som følgje av mellom anna flyktningstraumen frå Ukraina.
– Regjeringa følgjer utviklinga nøye, og iverksett stadig nye tiltak. I årets reviderte nasjonalbudsjett styrka vi utleigetilskotet til istandsetting, bygging og kjøp av utleigebustadar i kommunane med 400 millionar. Det vil auke tilbodet av utleigebustadar i kommunane. Vi vidareførte òg midlertidige satsar for bustøtta til å gjelde ut året. Det gjer at fleire får bustøtte og at mange får meir i bustøtte, seier Gjelsvik.
I tillegg vil regjeringa mellom anna:
- gjere det mogleg for fleire å eige sin eigen bustad, mellom anna ved å stimulere til fleire løysingar som gir førstegongsetablerarar ein enklare veg inn på bustadmarknaden.
- bidra til ein meir velfungerande leigemarknad og sikre rettighetane til leigetakarar på ein betre måte.
- vurdere lovendringar for å leggje til rette for fleire bustader med bustadkjøpsmodellar.
- foreslå å gi kommunane fleire verktøy i plan- og bygningslova for å leggje til rette for ein variert bustadsamansetning i ulike område.