Ny utlysing i Grøn plattform

– Grøn plattform er ei ordning for store, ambisiøse forskings- og innovasjonsprosjekt, og er eit viktig tiltak for å sikra lønsam og berekraftig grøn omstilling. Regjeringa ynskjer med dette å utløysa fleire og raskare investeringar frå bedriftene i grøne, berekraftige løysingar og produkt. Dette vil styrkja norsk verdiskaping og eksport og gjera oss i stand til å gjennomføre naudsynt grøn omstilling og skapa grøn vekst, seier næringsminister Cecilie Myrseth.

Om Grøn plattform

Grøn plattform er ei ordning som gir bedrifter og forskingsinstitutt midlar til grøn omstilling frå forsking og innovasjon. I denne ordninga jobbar næringsliv, ulike forskingsinstitusjonar, offentlege aktørar og katapultsentre saman for å realisera store grøne prosjekt. Slike prosjekt kan bidra til at Noreg lukkast med omstillinga av økonomi og næringsstruktur.

Grøn plattform er finansiert av Nærings- og fiskeridepartementet gjennom eit felles oppdrag til Forskingsrådet, Innovasjon Noreg og Siva. Verkemiddelaktørane samarbeider òg med Enova om ordninga.