Nye studieplassar på sjukepleie over heile landet

Behovet for fleire sjukepleiarar er stort. Difor aukar regjeringa kapasiteten med 500 studieplassar frå hausten 2022. No er 300 av plassane finansierte med friske midlar fordelte og det er Universitetet i Agder og Høgskulen i Molde som får flest nye studieplassar.

– Behovet for sjukepleiarar er stort, kanskje særleg i distrikta.  Det å ha nok fagfolk i helse- og omsorgstenestene der folk bur, er eit viktig mål for regjeringa. Pandemien har gjort det endå tydelegare at vi treng fleire sjukepleiarar og spesialsjukepleiarar. No aukar vi utdanningskapasiteten ved høgskular og universitet frå Agder i sør til Nordland i nord, seier forskings- og høgare utdanningsminister Ola Borten Moe.

300 av studieplassane blir  finansierte med 14,3 millionar kroner i 2022. Pengane er fordelte med utgangspunkt i tilbakemeldingane frå universiteta og høgskulane om kor dei har høve til å auke utdanningskapasiteten. Regjeringa har spesielt oppmoda institusjonane om å prioritere utdanningar i spesialsjukepleie.

– Det er mange gode kandidatar som søker seg til sjukepleiar- og spesialsjukepleiarutdanningane, men som ikkje kjem inn fordi det manglar studieplassar. Det er  særleg behov for fleire spesialsjukepleiarar. Derfor skal institusjonane prioritere vidareutdanning for jordmødrer, helsesjukepleiarar, og anestesi-, barn-, intensiv-, operasjon- og kreftsjukepleiarar, seier Borten Moe.

Tilbakemeldingane viser at fleire institusjonar følger opp målet til regjeringa om fleire utdanningstilbod i distrikta. Fleire av studieplassane er derfor tildelte institusjonar som skal bruke dei på vidareutvikling av gode tilbod som fordelte over heile landet.  

Dei resterande 200 plassane til grunnutdanninga i sjukepleie, som regjeringa har bestemt skal vere klare til hausten 2022, skal utdanningsinstitusjonane finansiere sjølve.

Fordeling av dei nye studieplassane på ulike studiestadar/geografi

Institusjon	Nye studieplassar	Geografi
Lovisenberg diakonale høgskole	10	Oslo
Høgskulen på Vestlandet	14	Blir fordelte mellom Haugesund, Bergen og Førde
Universitetet i Agder	59	Kristiansand og Grimstad
Universitetet i Stavanger	20	Stavanger
Noregs teknisk-naturvitskapelege universitet	4	Gjøvik
Høgskolen i Østfold	43	Plassane til grunnutdanninga er tenkt brukt til desentralisert utdanning i Indre Østfold, plassane til spesialsjukepleiarutdanninga er i Fredrikstad
Høgskolen i Innlandet	4	Ikkje avklart
Høgskolen i Molde – vitskapeleg høgskole i logistikk	52	Kristiansund og Molde
Nord universitet	25	Desentralisert utdanning - plassane blir fordelte på fem regionar ut frå søkargrunnlag/etterspørsel i dei ulike regionane. Spesialsjukepleiarutdanninga er i Bodø.
VID vitskaplege høgskole	32	Plassane til grunnutdanninga er i Sandnessjøen, plassane til kreftsjukepleiarutdanninga er i Oslo eller Bergen.
Universitetet i Søraust-Noreg	37	Campus Vestfold
SUM	300

Oversikt over ekstra studieplassar som universiteta og høgskulane skal prioritere innanfor eige budsjett

Institusjon	Fordeling innanfor eiga ramme
OsloMet	30
Høgskulen på Vestlandet	30
Universitetet i Agder	20
Universitetet i Stavanger	20
UiT – Noregs arktiske universitet	15
Noregs teknisk-naturvitskapelege universitet	25
Høgskolen i Østfold	10
Høgskolen i Innlandet	10
Høgskolen i Molde – vitskapleg høgskole i logistikk	10
Nord universitet	10
Universitetet i Søraust-Noreg	20
SUM	200