Oppsving i rypebestanden
Nyheit | Dato: 23.08.2024 | Landbruks- og matdepartementet
Rypebestanden utviklar seg positivt, opplever Statskog. Særleg i Nord-Noreg er det eit godt år for fuglen.
![Fjellrype.](/contentassets/a89eafe5f32a4452961a2a6fb2708d18/fjellrype-f-steinar-joansen-statsskog.jpg?preset=article&v=1803509901)
I fjor var talet på ryper så lågt at ein måtte stenga jakta fleire stader i Sør-Noreg. Men i år seier fagsjef for jakt og fiske Jo Inge Breisjøberget i Statskog at oppsvinget gjer at ein kan opna jaktområda att.
I Nordland og Troms har det vore mykje rype, og det har vore god kyllingproduksjon.
- Me har systematisk taksert rypebestanden i dei to fylka i to tiår. Talet i år er det sterkaste me har registrert heile denne perioden, seier Breisjøberget.
På Dovre er bestanden i år så liten at Statskog stenger for rypejakt.
![Rypejakt i Njardarheim.](/contentassets/a89eafe5f32a4452961a2a6fb2708d18/rypejakt-i-njardarheim-f-trond-gunnar-skillingstad-statskog.jpg?preset=article&v=-873373061)
Han forklarar vidare at bestanden har naturlege svingningar som kjem av mellom anna naturtap, klimaendringar og andre faktorar.
- Ei stadig sikrare jaktforvalting er uansett eit viktig bidrag til ein livskraftig rypebestand i Noreg, og me skal gle oss over den auken me ser no, seier Breisjøberget.
- Les meir om rypebestanden hjå Oppsving i rypebestanden | Statskog SF (ntb.no)
Det er ikkje berre for rypa at pilene peikar oppover. Teljingar frå jaktområda til Statskog i Nordland og Trøndelag viser ein oppgang for storfugl og orrfugl. Breisjøberget seier at stamfuglbestanden er stor, men at kyllingproduksjonen varierer.
- Tala tyder på at me ikkje kan sleppa til jegerar i alle skogområda våre. Me må gjera nærmare analysar på kor stort jakttrykk me kan tillata i dei enkelte områda.
Haustbare viltressursar
I 2018 overtok Landbruks- og matdepartementet ansvaret for den delen av forvaltninga som gjeld haustbare viltressursar, det vil seia artar ein kan jakta på. Bakgrunnen for det var mellom anna moglegheita for å styrka næringsutviklinga basert på berekraftig bruk av utmarksressursane.
Staten eig store areal med skog og utmark – om lag ein femtedel av Fastlands-Noreg. All statseigd skog og utmark blir forvalta av Statskog, som dermed er den største grunneigaren i Noreg.
Nokre av dei prioriterte arbeidsområda til Statskog er mellom anna å stimulera og legga til rette for berekraftig jakt, fiske og friluftsliv.