Personskatt: Endringar som bidreg til at folk får meir igjen av å arbeide

Samla vert inntektsskatten for personar redusert med 400 millionar kroner. Innanfor dette har regjeringa prioritert fordeling og verdiskaping.

– Endringane bidreg både til utjamning og til at folk får meir igjen av å arbeide. Om lag 85 prosent av skattytarane får redusert eller om lag uendra inntektsskatt, seier finansminister Trygve Slagsvold Vedum (Sp).

Regjeringa har over tid prioritert å auke personfrådraget, som er eit botnfrådrag i inntektsskatten. Det betyr mest for dei med låge inntekter. Mens personfrådraget var 52 450 kroner i 2021, vert det 88 250 kroner i 2024.

Samtidig har regjeringa prioritert å redusere trygdeavgifta på løn og næringsinntekt. Det har gjort at lønstakarar og næringsdrivande med låg og middels inntekt får meir igjen av å arbeide. Trygdeavgifta på løn var 8,2 prosent i 2021 og vert 7,8 prosent i 2024. Trygdeavgifta på næringsinntekt er redusert like mykje.

– Det skal løne seg å jobbe, både for lønstakarar og sjølvstendig næringsdrivande. Dette er tredje året på rad at vi reduserer trygdeavgifta, påpeikar finansminister Trygve Slagsvold Vedum.

Personar som bur i Finnmark og Nord-Troms, har enkelte eigne skattereglar. I 2023 har dei eit ekstra frådrag i inntekta (finnmarksfrådrag), lågare trinnskatt i trinn 3 (inntekt over 643 000 kroner) og lågare skatt på alminneleg inntekt. Regjeringa foreslår å auke finnmarksfrådraget til 30 000 kroner, samtidig som trinnskatten blir lik for heile landet. Det gjev samla sett lågare skatt for personar med låg og middels inntekt og enklare skattereglar.  

– Når finnmarksfrådraget no aukar til 30 000 kroner, er det nær dobla under denne regjeringa. Med dette følgjer vi opp distriktsmeldinga og tidlegare tiltak, som gratis barnehage og raskare sletting av studielån. At folk lever gode liv i Finnmark, er både bra distriktspolitikk og klok sikkerheitspolitikk, seier Vedum.

Auka trinnskatt i trinn 3 til 5 dekkjer inn delar av kostnaden ved å redusere trygdeavgifta. Minstefrådraget vert uendra. I formuesskatten vert verdsetjinga av næringseigedommar utanfor storbyane redusert slik at verdiane vert meir i tråd med marknadsverdiar. Det er ingen endringar i utbyteskatten.

Les meir i Prop. 1 LS (2023–2024) Skatter og avgifter 2024, kapittel 1, 3 og 4.

Sjå òg eigne pressemeldingar om frådrag i inntektsskatten og berekningsmetode for næringseigedom i formuesskatten.