Regionvekstavtale med Nordland fylkeskommune om grøn industriutvikling

Staten må samarbeide tett med komm­unar og fylkes­kommunar for å lykkast med den grøne  omstillinga. Grøn industriutvikling handlar om tilgang på nærings­areal, kompetanse, kraft og mineral, og det set krav til plan­arbeidet i kommu­na­­ne. Desse emna er derfor vald ut som innsatsområde i avtala med Nordland.

Kommunal- og distriktsminister Erling Sande (Sp) skal signere regionvekst­avtala med Nordland fylkeskommune på vegner av regjeringa, innan kort tid.

– Grøn omstilling er viktig for regjer­inga og for Noreg si framtid. Omstillinga krev ein ekstra innsats frå fleir, og at vi jobbar enda betre i lag. Det legg vi til rette for i Nordland nå med denne avtalen, seier Sande.

– Eg er glad for at Nordland fylkeskommune har vald grøn industriutvikling som tema for regionvekstavtala. Regjeringa si satsing på å utvikle norsk industri er avhengig av ei felles innsats for å lykkast, både på lokalt, regionalt og nasjonalt nivå. Denne avtala vil styrkje samarbeidet og legge til rette for lønnsame og attraktive jobbar og økt verdiskaping i Nordland, seier næringsminister Cecilie Myrseth.

Nordland og Rogaland er pilotfylke

Saman med dei to pilotfylka Nordland og Rogaland har departementet utvikla eit avtalekonsept der politisk samråd mellom staten og fylkes­kommunen er eit berande element. Målet med regionvekstavtala er å samarbeide om å utvikle og prøve ut nye løysingar.

− Eg har tru på at tettare samhandling mellom staten og fylkeskommunen vil gi betre og meir effektiv oppfølging av måla våre. Begge partar vil hauste lærdom som er viktig i gjennom­føringa av eit grønt industri­løft, både i pilotfylka og i resten av landet, seier kommunal- og distriktsministeren.

Fylkesrådsleiaren ser fram mot samarbeidet

Fylkesrådsleiar i Nordland, Svein Øyen Eggesvik (Sp), ser fram til å møte departementa til årlege politiske samråd, som grunnlag for målretta arbeid for grøn industriutvikling.

– Regionvekstavtala gir oss høve til å møte politisk leiing i departementa, for å diskutere konkrete flaskehalsar i arbeidet. Slik kan vi saman bidra til å skape nye, grøne arbeidsplassar i Nordland. Potensialet for økonomisk vekst og utvikling er utan tvil stort her, seier han.