Regjeringa foreslår 175 millionar til Helseteknologiordninga

– Helseteknologiordninga gir viktige insentiv til kommunane og styrker norsk helsenæring. Regjeringa følger opp vegkartet for helsenæringa og foreslår å styrke ordninga slik at kommunane kan investere meir i helseteknologi som journalløysingar og velferdsteknologi, seier helse- og omsorgsminister Jan Christian Vestre.

Formålet med Helseteknologiordninga er å gjere det meir gunstig for kommunar som går foran og tar initiativ til å investere i helseteknologi som journalløysingar og velferdsteknologi. I 2025 blir tilskotet til utvikling av helseteknologi styrka, og tilskotet til digital samhandling blir utvida til å bli retta mot utvikling og tilpassing av pasientjournalsystem.

Regjeringa meiner at ordninga bidrar til å styrke norsk helsenæring og kommunane, og det gir samla sett stabile rammevilkår for bestillarar og leverandørar av helseteknologi.

– Denne ordninga vil gi større moglegheiter for bedrifter som kan levere løysingar og teknologi som helse- og omsorgstenestene i kommunane treng. At løysingar blir tatt i bruk i heimemarknaden kan også vere eit springbrett for at norske helsebedrifter lykkast internasjonalt, seier næringsminister Cecilie Myrseth.

– Teknologi er også avgjerande for at ventetidene skal ned. No legg vi til enda fleire verkemiddel for å få dette til. Vi prioriterer å få på plass ei felles digital oversikt over legemiddel, prøvesvar og journaldokument. Dette vil frigi tid for helsepersonell og redusere risiko for feil. Det handlar om rett informasjon, på rett stad, til rett tid, seier Vestre.