Regjeringa gir 657 millionar kroner til studentbustader

– Å bygge fleire rimelege studentbustader er eitt av dei viktigaste grepa vi tek for å gi studentane betre økonomi og ein trygg stad å bu. Målet vårt på sikt er å bygge 3 000 nye bustader i året. Da må vi få opp byggetempoet, og det tek vi fleire grep for å få til, seier forskings- og høgare utdanningsminister Oddmund Hoel.

Fleire studentbustader i hovudstaden

Prosjektet som får mest er Studentsamskipnaden i Oslo med 201,5 millionar kroner til 480 nye hybeleiningar på Nordberg i Oslo.

– Leigeprisane i Oslo held fram med å auke kraftig. Derfor vil vi bygge ut bustadtilbodet til studentane i og rundt hovudstaden, slik at færre treng å leige bustad på den private leigemarknaden. Samtidig vil regjeringa bidra til ein trygg og føreseieleg leigemarknad. I Bustadmeldinga, som regjeringa nettopp har lagt fram, kjem det fleire målretta tiltak som også vil komme studentane til gode, seier Hoel.

Tiltak har gitt fleire søkarar

Det har vore ei utfordring å få nok byggeklare søknader dei siste åra. Regjeringa har derfor gjennomført fleire tiltak for å få fleire til å søke om tilskot til studentbustader.

– Vi har auka ramma for kor mykje kvar hybeleining kan kosta, og vi har gitt større fleksibilitet til samskipnadene. Det har hatt god effekt på søkartala, og det er eg veldig fornøgd med. Saman med ein fornya og styrka leigemarknadspolitikk vil regjeringa også vurdere andre tiltak som bidreg til fleire studentbustader framover, seier Hoel.

I tillegg har regjeringa i 2024 auka låneramma i Husbanken med 5 milliardar kroner, til 29 milliardar kroner. Det er ei auke på 50 prosent sidan regjeringsskiftet i 2021. 2,1 milliardar av ramma blir prioriterte til studentbustader.

I Bustadmeldinga vil regjeringa føreslå endringar som gjer ordninga for husbanklån til utleigebustadar betre. Regjeringa vil auke bruken av tilvisingsavtalar, slik at kommunen får fleire utleigebustadar. Regjeringa vil også redusere talet på konfliktar gjennom eit effektivt og kompetent husleigetvistutval, og gi Husbanken ei nasjonal fagrolle for leigemarknaden, som vil kome både myndigheitene og kommunane til gode.

Slik blir midlane til dei 1650 hybeleiningane fordelte

15 byggeprosjekt, fordelte på fem studentsamskipnader og ei bustadstifting får pengar i 2024. Samskipnadane søkte om tilskot til totalt 2 203 hybeleiningar. 15 av dei 17 prosjekta som har søkt får innvilga tilskot.

Samskipnad/ stifting	Studiestad	Prosjekt	Hybel-einingar	Tilskot i kr.
SiO	Lillestrøm	Lillestrøm studentby	311	111 431 300
SiO	Oslo	Vestgrensa studentby	1	419 800
SiT	Gjøvik	Studievegen	8	2 866 400
SiT	Gjøvik	Røverdalen	1	358 300
SiT	Trondheim	Nardovegen 12/14	172	72 205 600
SiO	Oslo	Nordberg studentby	480	201 504 000
SiO	Oslo	Gjerdrumsvei 10 D-F	26	10 914 800
SAMMEN	Bergen	Lotheveien 2-20	170	71 366 000
SAMMEN	Bergen	Grønneviksøren	6	2 518 800
SiS	Stavanger	Studentboliger U13	116,5	48 906 700
SiT	Trondheim	Østersunds gate 20	39,5	16 582 100
SiT	Trondheim	Festningsgata 11	5	2 099 000
SiT	Trondheim	Klostergata 20	24	10 075 200
Stiftelsen Blindern studenthjem	Oslo	Nordfløy	24	10 075 200
SiÅs	Ås	Pentagon studentby	266	95 307 800
SUM			1650	656 631 000