Regjeringa innvilgar lån til Årstadhuset på Haukeland

– Årstadhuset på Haukeland har husa Kvinneklinikken og skal no bli bygd om til lokale for psykiatri- og rusbehandling, slik at dette blir samlokalisert på Haukeland med somatikk. Dette vil gi pasientane eit heilskapleg tilbod framover, seier helse- og omsorgsminister Jan Christian Vestre.

I statsbudsjettet for 2025 foreslår regjeringa ei samla låneramme på 611 millionar kroner til ombygging og oppgradering av Årstadhuset på Haukeland universitetssjukehus ved Helse Bergen HF. I 2025 foreslår regjeringa ei utbetaling på 53 millionar kroner.

I tråd med Nasjonal helse- og samhandlingsplan blir det gjort forbetringar i finansieringsordninga for sjukehusinvesteringar gjennom å redusere eigenkapitalkravet for nye, større investeringar framover, slik at nødvendige investeringar kan bli realiserte raskare og at ein kan få betre rentevilkår på alle lån.