Rekordmykje EU-pengar til norsk forsking

Horisont Europa har eit budsjett på rundt éin billion norske kroner i perioden 2021–2027. Ambisjonen er at norske deltakarar skal hente heim 2,8 prosent av pengane som vert lyste ut. Til no har norske aktørar konkurrert seg til nesten 15 milliardar kroner, eller 3,31 prosent. Noreg ligg med det òg føre dei andre nordiske landa.  

– Europa må styrke konkurransekrafta si, og det hastar. Her spelar forsking og innovasjon nøkkelroller. Då er det godt nytt at Noreg går milliardar i pluss gjennom deltakinga vår i Horisont Europa. Noreg har vorte ein respektert samarbeidspartnar i Europa og det synest –norske aktørar tek i stadig større grad leiarrolla i prosjekta, seier forskings- og høgare utdanningsminister Oddmund Hoel (Sp).

På same tid får søknader med norsk deltaking betydeleg oftare tilslag enn snittet for alle søknadene som er komne inn til Horisont Europa. Det er norske deltakarar i 1 404 godkjende prosjekt. Det er nesten 10 prosent av alle prosjekta som har fått pengar.

Resultata frå dei godkjende prosjekta viser at 71 prosent av midlane Noreg har motteke så langt, er innanfor områda globale utfordringar og konkurransedyktig næringsliv.

– Norsk næringsliv gjer det godt i Horisont Europa, trass i sterk konkurranse. Dette viser kvaliteten på norske prosjekt. Deltakinga gir tilgang til kunnskap og samarbeid med europeiske FoU-miljø, som styrker konkurranseevna og bidreg til verdiskaping her heime, seier næringsminister Cecilie Myrseth (Ap).

Høgaste del norskleia prosjekt nokon gong

Norske aktørar held fram med å ta leiarrolla i eigne prosjekt. Nesten kvart fjerde samarbeidsprosjekt med norsk deltaking har norsk koordinator. Dette er høgare enn nokon gong før.

Av dei norske aktørane er det framleis SINTEF som gjer det desidert best, medan NTNU og Universitetet i Oslo gjer det best blant universiteta Blant institutta gjer NORCE og IFE – Institutt for energiteknikk det svært godt.

Topp 15 norske aktørar i Horisont Europa

Organisasjonsnavn	Mill. euro
SINTEF	186,3
Coalition for Epidemic Preparedness Innovations	140,0
Noregs teknisk-naturvitskaplege universitet (NTNU)	119,1
Universitetet i Oslo	111,6
Universitetet i Bergen	48,9
Noregs forskingsråd	46,9
Universitetet i Tromsø – Noregs arktiske universitet	37,7
NORCE Norwegian Research Centre	32,2
Oslo Universitetssjukehus HF	21,2
Noregs miljø- og biovitskaplege universitet (NMBU)	18,1
Institutt for energiteknikk	14,8
Folkehelseinstituttet	14,0
NILU	13,8
NIBIO – Norsk institutt for bioøkonomi	13,7
Norsk institutt for vannforskning (NIVA)	13,5