Reviderte vilkår for reguleringa av Hjartdal- og Tuddalvassdraga

Miljøtilstanden blir betra ved pålegg om minstevassføring, samtidig som dei opphavlege konsesjonsvilkåra blir oppgraderte til dagens standard.

– Sidan den regulerbare krafta er svært verdifull og av nasjonal verdi er det viktig å prioritere krafttap der det gir reelle miljøforbetringar av nasjonal og regional verdi. I denne saka foreslår me å påleggje minstevassføring i Heiåi, Bjordøla og i hovudelva Hjartdøla av omsyn til mellom anna friluftsliv, landskap og naturmangfald, seier energiminister Terje Aasland.,

Hjartdølautbygginga påverkar Hjartdal- og Tuddalvassdraga i Hjartdal kommune og Heiåi i Selfjord kommune. Utbygginga består av magasina Bonsvatn, Vindsjåen, Kovvatn, Skjesvatn og Breivatn samt overføringar av øvste del av Skorva, Vesleåi og Heiåi. Reguleringa vert utnytta i kraftverka Hjartdøla (443,8 GWh), Mydalen (26 GWh) og Bjordalen (8,7 GWh). Utbygginga er svært verdifull for kraftsystemet sidan den bidreg med om lag 478 gigawattimar (GWh) i årleg kraftproduksjon, og Hjartdøla kraftverk er ein viktig leverandør av systemtenester.

Hjartdal kommune, friluftsorganisasjonar og grunneigarar har fremja krav om revisjon av konsesjonsvilkåra knytt til negative verknader av reguleringa på fiske, friluftsliv, landskap og biologisk mangfald.

I Heiåi og Bjordøla vert det fastsett krav til minstevassføring av omsyn til friluftsliv, landskap og naturmangfald. I tillegg vert det innført krav om minstevassføring frå Hjartsjå til Hjartdøla, og dagens frivillige slepp i Omnesfossen vert no innlemma i det nye manøvreringsreglementet. Det vert ikkje innført restriksjonar i nokon av magasina, sidan magasina gir samfunnet  verdifull regulerbar kraftproduksjon. Vedtaket er i all hovudsak  samsvar med innstillinga frå Noregs vassdrags- og energidirektorat (NVE).

Vedtaket vil gi ein betre miljøtilstand i dei regulerte vassdraga, samtidig som tapet av verdifull, regulerbar kraftproduksjon vert avgrensa. Dei stadfesta endringane vil gi eit samla årleg krafttap på om lag 3,9 GWh.

Skagerak Kraft AS vert pålagd å bidra med 2,2 millionar kroner til eit villreinfond, sidan reguleringa har ført til negative konsekvensar for villreinbestanden i Brattefjell-Vindeggen villreinområde.

I åra framover skal fleire regulerte vassdrag opnast for revisjon. Pålegg om minstevassføring og magasinrestriksjonar vil bli fastsett i dei sakene der det vil gi størst miljøgevinst. Kostnaden, i form av redusert, regulerbar kraftproduksjon, vil vere eit viktig omsyn i desse prosessane.

Etter vassdragsreguleringslova § 8 kan tidlegare gitte tidsuavgrensa konsesjonar reviderast 50 år etter at dei blei gitt, og deretter kvart 30. år. Reglane om revisjon gir moglegheit for å setje nye vilkår for å rette opp skadar og ulemper for allmenne interesser som har oppstått som følgje av vassdragsreguleringar. Representantar for allmenne interesser knytt til vassdraga,som til dømes miljøorganisasjonar og kommunar, kan be om at det skal setjast i gang ein revisjon.

Lenke til kongelig resolusjon: Reviderte vilkår for tillatelser til Skagerak Kraft AS for reguleringen av Hjartdals- og Tuddalsvassdraget mv. i Hjartdal og Seljord kommuner