Saman for å styrkje digital kompetanse i arbeidslivet
Pressemelding | Dato: 22.10.2024 | Digitaliserings- og forvaltningsdepartementet
Digitaliserings- og forvaltningsminister Karianne Tung fekk viktige innspel frå partane i arbeidslivet til korleis dei i fellesskap kan finne løysingar for å løfte den digitale kompetansen i samfunnet. Tilgang på digital kompetanse i arbeidslivet og i samfunnet elles, var tema då digitaliserings- og forvaltningsministeren inviterte til det andre møtet i regjeringa sitt digitaliseringsforum.
– Norsk næringsliv treng meir digital kompetanse. Skal vi lukkast med den grøne og digitale omstillinga, må vi i fellesskap sørgje for at vi har føresetnadene til å klare det. Dette møtet er eit viktig bidrag for å kome eit steg lenger, seier digitaliserings- og forvaltningsminister Karianne Tung.
Noreg står overfor fleire utfordringar når det gjeld tilgangen på digital kompetanse:
- Andelen studentar som vel realfag og teknologi i høgare utdanning er lågare enn OECD-snittet.
- Etterspurnaden etter arbeidskraft med IT-kompetanse er høgare enn tilgangen.
- Offentleg sektor og næringslivet slit med å rekruttere personar med relevant IKT- og digital kompetanse.
I dag rapporterer 82,5 prosent av statlege verksemder at dei har problem med å rekruttere IKT-spesialistar, og 64 prosent av bedriftene har eit udekt behov for IKT-kompetanse.
I digitaliseringsstrategien har regjeringa sett seg klare mål fram mot 2030:
- Andelen statlege verksemder som har problem med å rekruttere IKT-spesialistar skal reduserast med 15 prosent.
- Andelen bedrifter med underdekt IKT-kompetansebehov skal vere på under 55 prosent.