Signerer i dag norsk-dansk felles erklæring

– Ambisjonen vår er å gjera Noreg og Danmark, og Norden, til ein grøn industri- og energiregion basert på naturressursar, kunnskapsmiljø, industriell kompetanse og det felles verdigrunnlaget vårt, seier næringsminister Jan Christian Vestre.

Felleserklæringa vart undereigna i Århus av Vestre og næringsminister Morten Bødskov i samband med Kongeparets offisielle besøk til Danmark 15. og 16. juni. Besøket markerer dei historiske banda og det nære naboforholdet mellom Noreg og Danmark.

Erklæringen kan lastes ned her

Fem innsatsområde

I erklæringa stadfestar Danmark og Noreg at dei to landa skal styrke dialogen for å bygge og forsterke den grøne industrien og arbeide for å nå klimamåla i Paris-avtalen.

– Vi skal ha jamleg dialog og samarbeide om politikkutforming til det beste for begge land, seier Vestre

– Dei to landa våre har eit felles verdigrunnlag og industrielle fortrinn som utfyller kvarandre godt. Det gir gode føresetnader for å etablere sterke klynger, berekraftige og trygge verdikjeder og teknologiske løysingar som saman kan bidra til at landa våre vil lykkast med den grøne omstillinga. Me har mykje å vinne på å dra nytte av kvarandre sine styrker, seier næringsministeren.

Det forsterka samarbeidet omfattar fem område:

1. Fornybar energi, karbonfangst- og lagring, og hydrogen
2. Helseteknologi og livsvitskap
3. Blå havøkonomi, inkludert grøn skipsfart
4. Teknologiutvikling og digitalisering
5. Forsvarsindustri

– Vi politikarar bør engasjere oss og samarbeide meir strategisk for å legge til rette for eit sterkt og dynamisk næringslivssamarbeid. Samtidig er det næringslivet og bedriftene sjølv som må vere i førarsetet og ta ansvar for å utnytte marknadsmoglegheitene, inngå samarbeid og handtera utfordringane som følgjer av det grøne skiftet, seier Vestre.