Spelemidlar til idrettsformål 2024: meir pengar enn nokon gong

–Alle barn og unge skal ha høve til å delta i fritidsaktivitetar, uavhengig av kor dei bor eller foreldra sin økonomiske situasjon, seier kultur- og likestillingsminister Lubna Jaffery. I  fordelinga av spelemidlar til idrettsformål prioriterer vi grep som skal bidra til å senka terskelen – slik at enda fleire og alle som vil skal kunne finna sin plass i idretten.

I 2024 aukar regjeringa avsetninga til idrettsanlegg i kommunane med 180 millionar kroner samanlikna med året før. Nærmare 2 milliardar kroner blir føreavsett til idrettsanlegg i kommunane.

– Tilgang på anlegg er ein av dei viktigaste føresetnadene for eit breitt og tilgjengeleg idrettstilbod, seier kultur- og likestillingsminister Jaffery.

– Fordelinga i 2024 gjer at nesten 40 prosent av søknadsbeløpa blir innvilga og gjennomsnittleg ventetid redusert med nesten eit halvt år. Vi tar også ned etterslepet frå nesten 3,5 milliardar kroner i 2023 til i underkant av 2,7 milliardar kroner i 2024. Med det har vi redusert etterslepet med godt over 1,8 milliardar kroner i løpet av perioden til denne regjeringa, seier Jaffery.

– Vi held fram og aukar innsatsen for å senke terskelen for deltaking, derfor prioriterer vi dette seier Jaffery.

130 millionar kroner blir avsett til tilskotsordninga som vart etablert ved hovudfordelinga i fjor; Ekstrainnsats for deltaking i idrettslag. I fjor var tilskotet 125 millionar kroner. Tilskotet til lag og foreiningar, dei såkalla LAM-midlane er òg auka, idrettslaga får 485 millionar kroner – det vil seie 38,5 millionar kroner meir enn i fjor.

• Pressemelding: 130 millioner kroner ekstra til å senke prisen og øke deltagelse i idretten

Totalt går 7,1 milliardar kroner frå overskotet til Norsk Tipping til idrett, kultur og frivilligheit.

• Full oversikt over fordelinga av speleoverskotet

I 2024 blir det fordelt 3 723 millionar kroner til idrettsformål frå overskotet til Norsk Tipping. Dette er ein auke på 288 millionar kroner frå i fjor:

Post	Tiltak – idrettsformål	Fordeling 2024 (kroner)	Per post 2023 (kroner)
1	Idrettsanlegg	1 935 398 000	1 770 565 000
1.1	Idrettsanlegg i kommunane*)	1 868 398 000
1.3	Løypetiltak i fjellet og overnattingshytter	32 000 000
1.4	Utstyr	35 000 000
2	Nasjonalanlegg/spesielle anlegg	90 286 000	78 620 000
2.1	Nasjonalanlegg	89 901 000
2.2	Spesielle anlegg	385 000
3	Forskings- og utviklingsarbeid	39 814 000	36 212 000
3.1	Idrettsforsking	24 500 000
3.2	Idrettsfagleg utvikling	5 000 000
3.3	Anleggsfagleg utvikling	2 000 000
3.4	Digital utvikling	6 100 000
3.5	Utviklingsarbeid i fylkeskommunane	2 214 000
4	Spesielle aktivitetar	169 965 000	159 215 000
4.1	Antidopingarbeid mv.	61 465 000
4.2	Fysisk aktivitet og inkludering i idrettslag	33 500 000
4.3	Friluftstiltak for barn og ungdom	46 000 000
4.4	Eigenorganisert fysisk aktivitet	14 000 000
4.5	Arrangementstilskot	15 000 000
5	Norges idrettsforbund og olympiske og paralympiske komité	870 000 000	810 000 000
6	Tilskot til lokale lag og foreiningar	485 000 000	446 500 000
7	Særskilte tilskot	132 500 000	133 684 000
7.1	Mangfald og inkludering	2 500 000
7.2	Ekstrainnsats for deltaking i idrettslag	130 000 000
	Totalt	3 722 963 000	3 434 796 000
*) I tillegg blir det brukt 18 millioner kroner av disponible midlar, slik at fordelinga frå post 1.1 blir 1 886 398 000 kroner.