Statsbudsjettet 2025
2,4 milliardar kroner til kjøp av regionale flyruter
Pressemelding | Dato: 07.10.2024 | Samferdselsdepartementet
– Eit godt og tilgjengeleg flyrutetilbod i heile landet er ein viktig prioritet for regjeringa, og vi har meir enn dobla tilskotet til FOT-rutene, med dei nye avtalene som tredde i kraft i 2024. I 2024 har vi styrkt tilbodet med halvering av maksimalprisane, styrking av kapasiteten og to nye ruter. Desse tiltaka vil vi halde fram med i 2025, seier samferdselsminister Jon-Ivar Nygård.
Regjeringa gjennomførte i 2024 ei halvering av maksimaltakstane i dei nye FOT-ruteavtalane. I tillegg blei kapasiteten styrka, og dei to nye rutene Kirkenes-Tromsø og Stord-Oslo blei inkludert i ordninga. Dei nye avtalane tredde i kraft 1. april og 1. august 2024.
Regjeringa vidarefører dei nye tiltaka i 2025. Regjeringa foreslår å auke løyvinga med 492,5 millionar kroner frå saldert budsjett 2024, som i hovudsak er heilårseffekt av dei nye avtalane. Totalt foreslår regjeringa å løyve 2,4 milliardar kroner til kjøp av regionale flyruter, dei såkalla FOT-rutene, i 2025.
– Luftfarten er avgjerande for å sikre befolkninga i heile landet tilgang til helsetenester, utdanning og andre offentlege tenester, effektive arbeidsreiser, privatreiser, moglegheiter for utvikling av reiselivsnæringa, og frakt av post og tidskritiske varer. Dette gjeld ikkje minst i distrikta, seier samferdselsminister Jon-Ivar Nygård.