Trappar opp innsatsen for å redusere forseinkingar og innstillingar i togtrafikken

Regjeringa foreslår å løyve 6,6 milliardar kroner til drift og vedlikehald av infrastrukturen på jernbane i 2025, ein auke på 26 prosent frå 2024. Til fornying av jernbanen er det prioritert drygt 5,5 milliarder kroner, som er 38 prosent meir enn i fjor. Samla blir  løyvinga til drift, vedlikehald og fornying foreslått auka med 3,2 milliarder kroner.

Prioriterer område der tiltaka kjem mest til nytte

– Tiltaka innan vedlikehald og fornying vil bli prioritert der dei kjem mest til nytte for person- og godstrafikken. I Oslo-området er det mykje køyring på spora, og infrastrukturen blir då raskt slite ned. Vedlikehald og fornying blir då viktig for at toga kan halde rutetabellane. Forseinkingar kan forplante seg raskt i jernbanenettet, og tiltak i Oslo-området vil kome jernbanen i heile landet til gode. I tillegg er prioriteringa av desse to tiltaka heilt avgjerande for at jernbanen skal vere betre rusta til å tole ekstremver og klimaendringar rundt om i landet, seier samferdselsministeren.  

Løyvingsforslaget følgjer opp prioriteringa i Nasjonal transportplan 2025-2036 (NTP) om å ta betre vare på dagens jernbane. Overslag frå Bane NOR viser at auka vedlikehalds- og fornyingsinnsats og ny arbeidsmetodikk kan redusere innstillingar og forseinkingstimar mot slutten av NTP-perioden 2025-2036 med opptil 30 prosent samanlikna med i dag.

Betring over tid

– Å betre tilstanden på jernbanenettet er ikkje gjort i ei handvending, men ei opptrapping av arbeidet med vedlikehald og fornying kjem til å gi positive resultat over tid. I tillegg vil blant anna nye tog og innføring av det digitale signalsystemet ERTMS bidra til å redusere talet på innstillingar og forseinkingstimar i togtrafikken i åra framover, seier Nygård.

Foreslår meir til dagens jernbane enn til nye, store prosjekt

Regjeringa foreslår 32,6 milliardar kroner til jernbaneformål i 2025.

Av dette er i alt 12,1 milliardar kroner foreslått løyvd til drift, vedlikehald og fornying av jernbanenettet. Til større investeringsprosjekt –  som blant anna bygging av InterCity-strekningar på Austlandet, elektrifisering av jernbanen i Trøndelag og innføring av det nye, digitale signalsystemet ERTMS – har regjeringa foreslått å løyve 11,7 milliardar kroner.

– For første gong på minst fem år foreslår ei regjering å løyve meir til å halde toga i rute enn til nye store utbyggingsprosjekt. Vårt mål i Nasjonal transportplan 2025-2036 er å trappe opp arbeidet med vedlikehald og fornying også dei komande åra. Vi skal sjølvsagt bygge nytt også, men ein meir punktleg togtrafikk er jobb nummer ein, seier samferdselsministeren.

Om drift, vedlikehald og fornying

Drift er den løpande driften av jernbanen som ikkje fører til endringar av infrastrukturen – mellom anna straumforsyning, vinterberedskap, trafikkstyring, kundeinformasjon, og drift av stasjonar og godsterminalar.

Vedlikehald er reparering av infrastrukturen – enten førebygjande, for å unngå at det oppstår feil, eller korrektivt, for å rette opp feil som har oppstått.

Fornying er utskifting av anlegg, når det ikkje lenger er mogleg eller hensiktsmessig å reparere. Manglande vedlikehald kan føre til at det raskare blir behov for fornying.