Styrker det statlege eigarskapet i det norske gasstransportsystemet

– Det norske gasstransportsystemet er heilt sentralt for verdiskapinga på norsk sokkel og energitryggleiken i Europa. Staten ønskjer på sikt eit heilstatleg eigarskap for dei sentrale delane av dette systemet, og Petoro vil vere ansvarleg for å forvalte dette auka statlege eigarskapet. Då er det avgjerande at Petoro har tilstrekkelege ressursar for å gjere dette på ein forsvarleg måte, seier næringsminister Cecilie Myrseth.

Store delar av konsesjonane i gasstransportinteressentskapet Gassled går ut i 2028, og staten ønskjer på sikt eit heilstatleg eigarskap for dei sentrale delane av gassinfrastrukturen. Energidepartementet arbeider no med moglegheitene for auka statleg eigarskap før konsesjonstida går ut i 2028. Petoro AS forvaltar mellom anna dagens statlege eigardelar i gassinfrastrukturen. Denne ordninga vil bli vidareført ved auka statleg eigarskap. På denne bakgrunnen blir det foreslått å auke Petoro si løyving med 23 millionar kroner.

Den norske staten har gjennom Statens direkte økonomiske engasjement (SDØE) betydelege eigardelar i petroleumsverksemda på norsk sokkel. Berre i 2023 var statens inntekter frå denne ordninga på 277 milliardar kroner, og heile SDØE-porteføljen blei i år verdsett til 1 486 milliardar kroner.

–  Regjeringa sitt forslag understrekar betydninga av det norske gasstransportsystemet og bidreg til at Petoro kan fortsette å skape store verdiar som kjem det norske fellesskapet til gode, seier Myrseth.